Umufi owayengusomabhizimusi uMnu. Genius “Ginimbi” Kadungure obhubhe ngeSonto edluleyo engozini yomgwaqo, ungcwatshwe ngoMgqibelo emzini wakhe eDomboshava, lapho avaleliswe zinkulungwane lenkulungwane zabantu ababikwa bebevela emazweni atshiyeneyo omhlaba.
Bebeyinhlabathi bengazani abantu abaze kulomkhosi lapho obekuculwa ingoma ezehlukeneyo ezibalisa ezokholo lezinye ezokuzithokozisa, kuvaleliswa uMnu. Kadungure obhubhele emgwaqweni oquma emzini weBorrowdale. Ubikwa wayevela emcimbini wokuthakazelela usuku lokuzalwa kukaNkosazana Michelle Amuli laye ophelele kuleyongozi.
Imota owayeyigadile yangqikilana leyinye, yatshayelela esihlahleni yasilumatha.
Isikhulumeli samapholisa u Assistant Commissioner Paul Nyathi utshele lumsakazo ukuba ingozi le, ethethe umphefumulo kaGinimbi labangane bakhe abathathu, yabangelwa yikungalandeli imithetho yomgwaqo kanye lokugijima ngesiqubu esikhulu. Uxwayise uzulu ukuba alandele imetheho yokusetshenziswa kwemigwaqo.
Lanxa ubechazwa njengomuntu obeqhuba amabhizimisi akhe ngendlela engacacanga, ebalisa ukuthengisa amandla omlilo wohlobo lweGas, inengi labakhulume ngaye lithe ubengumuntu owayesebenza gadalala ukuzithuthukisa lokuthola imali yenzuzo.
Udadewabo kamuyi uJuliet utshele abakade bekulombuthano ukuthi umnewabo wakhula ehlupheka kodwa wayehlala emtshela ukuthi ufuna ukubuqeda ubuyanga.
Abangane bakhe bathe akusiqiniso ukuthi wayesebenzisa imithi ukuzinothisa njengalokho okutshiwo ngabanye.
Omunye wabangane bakaGinimbi uthe umufi wayengumuntu owayelesiphiwo sokusebenza nzima hatshi ukusebenzisa inyoka.
Omunye wabakhulumisane lalo umsakazo uMnu. Victor Dube, isakhamuzi saseBudiriro eHarare, uthi lanxa wayengamazisisi umuyi, kusobala nxa ehlolisisa imisebenzi yakhe ukuthi wayengumuntu othanda ukukholisa.
UGinimbi obeseleminyaka engamatshumi amathathu lasithupha yokuzalwa - 36, ubhubhe ndawonye labangane bakhe behamba ngemota yakhe yohlobo lwe Rolls Royce Wraith, ababalisa oMnu. Limumba Karim waseMalawi, uNkosazana Michelle Amuli, owaziwa ngelokuthi Mimi Moana kanye lentombazane yeMozambique u Elisha.
Izihlobo zika Michelle lezika Karim bezikhona kulomngcwabo kanye lezakhamizi labangane.
