Kube lokujabula okukhulu kubalandeli kanye lalabo abaphatheke kumdlalo wenguqu ngenyanga kaNtulikazi lapho okususwe khona isijeziso esokuba eleZimbabwe lingaphatheki kunhlelo zeFederation of International Football Association, iFIFA.
Ekhuluma ngemva kokuba iqembu leZimbabwe limenywe ukuyadlala kwele Botswana ngemva kokuvunyelwa kwalo ukudlala lamanye amazwe, umdlali weqembu lesizwe uPeter Muduhwa uveze ukuthokoza okukhulu ngalesi sehlakalo.
“Kuyathabisa ngoba njengabantu beZimbabwe siyafuna ukubona iqembu lesizwe lidlala njalo nxa iqembu lesizwe nxa lidlala lamanye amaqembu kuyaphathisa ukuba amaqembu akithi aqine ngoba akulamdlali ongafuni ukudlalela iZimbabwe. Ngalokho ke siyajabula ukuba iqembu lesizwe selisenelisa ukudlala lamanye amaqembu njalo labalandeli bethu bayakujabulela kakhulu lokhu.”
Inhlanganiso yeFIFA ibimise eleZimbabwe ukuphatheka kunhlelo zalo ngenyanga kaNhlolanja ngo2022 ngemva kokuba kube lokungenela kukahulumende ekusebenzeni kwenhlanganiso yeZimbabwe Football Association, iZIFA.
Inhlanganiso yeFIFA ikhethe ikhomithi ekhokhelwa nguLincoln Mutasa ukuba ikhokhele umdlalo wenguqu kweleZimbabwe kuze kube ngomnyaka ozayo lapho okuzaqhutshwa khona ukhetho lokudinga inkokheli entsha.
Kusenjalo, iqembu leNgezi Platinum yilo elizamela ilizwe kumncintiswano weCAF Champions League ngomnyaka ozayo ngemva kokuphakamisa isicoco seligi kuthi eleDynamos lona lizaphatheka kumncintiswano weCAF Confederations Cup ngemva kokuphakamisa inkezo yeChibuku Super Cup.
Sikhangele umdlalo kakhilikithi: Iqembu labesilisa elimela ilizwe emdlalweni kakhilikithi lidanise abalandeli balo lonyaka ngemva kokwehluleka kwalo ukuyadlala kumncintiswano wezizwe zomhlaba ikanti elabesifazane lona liqhuba ngcono.
Intathelizindaba yezemidlalo uPraise Dumi Dlakama uthi kumele iqembu labesilisa liqale phansi ukuze lingaqhubekeli phambili lisiba yinhlekisa.
“Kubomama khona kungcono ngoba bayenelise ukuphumelela ukuyadlala kumcintiswano wezizwe zomhlaba oweT20. AmaChevrons bona kumele baqale phansi kukhangelwe abafana abadlala kuhle kudomestic cricket kube yibo abadlala kuqembu lesizwe. Lomqeqetshi uDave Hougthon laye yikho akhale ngakho ukuba kulokhu kudlaliswa laba abangayenzi kuhle lakudomestic cricket yikho okuyinkinga enkulu.”
Umqeqetshi uHoughton utshiye umsebenzi ngemva kokuba iqembu leZimbabwe linqotshwe ngamazwe abalisa iUganda kanye leNamibia kumncintiswano owokudinga amaqembu azakuyaphatheka kumidlalo yezizwe zomhlaba eyohlobo lweT20 ngomnyaka ozayo.
Iqembu labesifazane elaziwa ngokuthi Lady Chevrons lona lisaselalo ithuba elokuyaphatheka kumidlalo yezizwe zomhlaba eyohlobo lweT20 ngemva kokunqoba kumidlalo yezwekazi laseAfrica njalo kuzamele liphumelele kumidlalo yeGlobal Qualifier ezakuba khona ngomnyaka ozayo.
Iqembu labesifazane elimela ilizwe emdlalweni webhola lokuqaga liphutshe lisendaweni yetshumi lantathu kumncintiswano weNetball World Cup oqhutshelwe elizweni leSouth Africa phakathi komnyaka.
Bekungokwesibili ukuba iqembu leZimbabwe lifinyelele ukuyancintiswa kumidlalo yezizwe zomhlaba njalo osakhulayo uNokuthaba Moyo uthi lokhu kutshengisa ukuba ikusasa yalumdlalo inhle kakhulu.
“Akusiyonto encane ukuyadlala kumidlalo yezizwe zomhlaba and lokhu kutshengisa ukuba kulethalenta kweleZimbabwe. Akukucabange ukuthi kungenzakalani nxa kungatholakala usekelo oluyaneleyo oluvela kuhulumende. Lingenza izimanga iqembu lamaGems.”
Iqembu labesilisa elimela ilizwe emdlalweni webhola lokuqaga liphutshe lisendaweni yesibili kumncintiswano weAfrica Netball Championships oqhutshelwe kwele Botswana ensukwini ezedluleyo. Leliqembu laziwa ngegama elithi Golden Gems.
Forum