Ugatsha lukahulumende weleMelika oluphathisa amanye amazwe, olwe United States Agency for International Development – USAID, ngoLwesihlanu luphawule okusemthethweni, inhlelo ezintathu kwezokulima, ezizaqhutshwa ezigabeni ezinhlanu elizweni,okweminyaka emihlanu, ngenhloso yokuqeda ubuyanga emaphandleni.
Lezinhlelo ezenziwa ngaphansi kwesihloko esithi FEED THE FUTURE, ziphawulwe ngesikhathi eleZimbabwe limanyane lamanye amazwe womhlaba wonke, ukunanza usuku lapho kuqakathekiswa khona ukutholiswa kwabantu ukudla okwanelayo lwe United Nations World Food Day.
Obengumhlonitshwa emkhosini wokuphawulwa okusemthethweni kwalezinhlelo,owenzelwe e Wild Guise eHarare,unobhala kugatsha lwezokulima,u manjinela Ringson Chitsiko,uthi ujabulela ukuphawulwa kwenhlelo eziqondiswe kubalimi bemaphandleni lezinhlelo ngehlose yokuqeda indlala lobuyanga obubhahe kakhulu kibo.
Ummeli we USAID kuleli , unkosikazi Stephanie Funk uveze ukuba uhulumende wakhe ekubone kufanele aphawule loluhlelo lwe FEED THE FUTURE, luthatha indawo yalolo obeluvele luqhutshwa,ukuthuthukisa ezokulima emaphandleni,lwe Zimbabwe Agricultural Income and Employment Development (Zim-AIED),oluqhutshwa ekupheleni kwawonalo umnyaka.
Osebenza kuhlangothi lwezokukhulumisana lozulu ,ehofisini yommeli wakweleMelika kuleli,umnumzana Sizane Weza,uyaluncoma loluhlelo oluphawulwe ngabe USAID lamuhla ekuseni.
Lezinhlelo zontathu, zizoqhutshwa ngokusebenzelana kukahulumende lenhlanganiso ezihlezi zisebenza labe USAID laba okubalisa eye Fintrac,Linkages for Economic Advancement for the Disadvantaged – LEAD kanye labe Development Aid from People to People ( DAPP ) kuveza u Weza.
Abe USAID bathi loluhlelo lweminyaka emihlanu, luhlose ukuphathisa izimhuli ezedlula inkulungwane ezingamakhulu angamatshumi ayisikhombisa ( 70,000 rural households ),kusitsho ukuba luzafinyelela inkulungwane ezingamakhulu amathathu alamatshumi amahlanu abantu ( 350,000 ).
Luzaphathisa ekuthuthukiseni indlela zokulima, batholiswe lapho abangathengisela khona izilimo lezifuyo zabo laba balimi,bafundiswe laba balimi ukuqhuba imisebenzi yabo njengebhizimusi,banelise ukuthola usizo lwemali yezikwelede emabhanga, ukudla okulohlonzi kanye lendlela zokulondoloza ukuhlanzeka ezabelweni.
