Ilizwe linanze ikhefu leUnity Day ngoMvulo abanye besithi lelikhefu alisatsho lutho kuzulu.
Ikhefu leli lasungulwa kulandela ukumanyana kweZapu leZanu ngo1987, kusivumelwano esaqeda umbuqazwe weGukurahundi owabulalisa abantu beMidlands leMatabeleland abedlula inkulungwane ezingamakhulu amabili.
Umkhokheli weZapu uMnu Joshua Mqabuko Nkomo wavuma ukubambana leZanu kaMongameli Mugabe ukuqeda ukuchitheka kwegazi.
Phansi kwesivumelwano lesi, uNkomo waba ngumsekeli kaMugabe njalo kusukela lapho omunye wabasekeli bakaMugabe ukhethwa evela kubandla leZapu.
Kodwa kulandela ukuphuma kwamanye amalunga eZapu kuZanu PF eminyakeni edluleyo, ekhokhelwa nguMnu Dumiso Dabengwa, abanye bathi asisatsho lutho lesi sivumelwano.
Ukuhlaziya lolu daba sixhume isiphathamandla seZapu uMnu Strike Mkandla lelunga leZanu PF uMnu David Ndlovu.
Esungula lingxoxo uMnu Mkandla uthe asincedi muntu isivumelwano yesi, yikho nje waphuma kubandla leZanu PF.