Abenhlanganiso ezilwela amalungelo oluntu, amabandla ezombusazwe, labamabandla atshiyeneyo ezokholo ngoLwesine bafole bebambane izandla bekhankasela ukuthula phambilini kokhetho oluzakwenziwa ekupheleni kwenyanga.
Wonke umuntu obekulumbuthano uvumelane ukuthi ukhetho kumele lwenziwe ngokuthula njalo abantu kumele batshiyane lomkhuba wodlakela ngesikhathi sokhetho.
Umqondisi wenhlanganiso eyeZimbabwe Christian Alliance, uReverend Useni Sibanda, uthe umkhankaso lo ujonge ukuthi abamabandla ezombusazo ahlangane azobhalelana phansi ukuthi ukhetho lwalonyaka lwenziwe ngokuthula ngakho abantu bakhankase bengalwisani labomakhelwane.
Umsekeli kaMongameli webandla leMthwakazi Republic Party, uNkosazana Pressia Ngulube, ukhalaze ngembali yokuhkukunyezwa ngesikhathi sokhetho okuvamileyo koBulawayo.
Omunye wabancintisayo ekhethweni emele iMDC-T uNkosikazi Nomvulo Mguni uthe bahlangane labanye ukutshengisa ukuthi bazimisele ukuthi kube lokuthula ngesikhathi sokhetho.
UMnu. Iphithule Maphosa, isikhulumeli seZAPU, uthe lo ngumkhankaso omuhle njalo uveza isifiso sokuthi kube lokhetho olulempumela ezakwamukelwa ngabantu.
Abakhokheli bamabandla ezobusazwe lawezokholo bathi kumele kuhlale kulokuthula elizweni ngezikhathi zonke zokhetho kungadingeki ukuba abantu balwisane ngokuthi basekela liphi ibandla lezombusazwe.
