Abasakhulayo abahlanu abaseMelika phansi kohlelo lweMandela Washington Fellowship ngoLwesine baphiwe ithuba lokukhuluma edale leCongress lapho abakhuthaze khona amazwe leafrica ukuthi ekele ukuncindezela abesifazana labasakhulayo.
Abasakhulayo laba bebenxusiwe yikomidi ebona ngobudlelwano beMelika lamazwe eAfrica ukuthi bazekhuluma ngodaba lombuso okhululekileyo eAfrica.
Baveze ukudana ngokuncindezelwa kwabesifazana emazweni atshiyeneyo okwenza behluleke ukuphatheka kuzinqumo eziphatha impilo zabo.
Omunye wabakhulume kulumbathano, obugoqela uzulu nje lamalunga edale leCongress, nguMnu Hlanganani Gumbi owebandla eliphikisayo eleDemocrartic Alliance kweleSouth Africa.
UMnu Gumbi utshele iStudio 7 ngemva kwalumhlangano ukuthi ukhathazekile kakhulu ngokwenzakala eZimbabwe.
Wengeze wathi abasakhulayo kumele baphatheke ngokugcweleyo kundaba eziphatha ikusasa labo, ezigoqela ezombusazwe.
Abanye abakhulumileyo nguMary Ashinyo oweGhana oveze ukuthi osaziwayo elizweni lakhe badlala umlandu omqoka ekukhuthazeni abasakhulayo ukuthi baphatheke kundaba eziphatha ikusasa labo.
Abanye nguPamela Kanora oweTanzania, uEric Besong oweCameroon kanye loKennedy Mwikya oweKenya.
UMwikya ukhuthaze uMongameli Barack Obama ukuthi akhulume ngodaba lokulondolozwa kwamalungelo oluntu ngesikhathi esethekelela izwekazi leAfrica kulinyanga.
Lanxa abasakhulayo beZimbabwe bebengekho kulumbuthano, bangamatshumi amathathu abakuhlelo lweMandela Washington Fellowship njalo bonke abaphatheka kuloluhlelo bangamakhulu amahlanu.
