Inhlanganiso elwela amalungelo oluntu emhlabeni jikelele eyeAmnesty International namuhla ikhuthaze uhulumende weZimbabwe ukuba abumbe ikhomishini ekhokhelwa ngabahluleli bemithethwandaba ezaphenya ukunyamalala kwentathelizindaba uItai Dzamara, yena oseleminyaka eyisitshiyagalolunye, 9, engazakali ukuthi watshonaphi.
Embwikweni ewethule namuhla iAmnesty International ithe kuyamangalisa ukuthi umuntu enganyamalala ngalindlela kuphele nje kungabindaba zalutho.
UDzamara wathunjwa ngomnyaka ka2015 mhlaka 9 Mbimbitho emzini weGlen Nora eHarare ngabantu abacatshangelwa ukuthi ngabacuphi bakahulumende ama-CIO, wanyamalala kokuphela.
Wayesaziwa kakhulu ngokuhlala etshengisela eUnity Square eHarare esola uhulumende kamuyi uMnu Robert Mugabe esithi wayebusa kubi njalo esithi uMugabe kumele asuke embusweni.
Phambi kwakusasa ngoMgqibelo, uDzamara ufikisa iminyaka eyisitshiyagalolunye kungazakali ukuthi ungaphi lokuthi usaphila na.
Umsekeli kamholi weAmnesty International emhlubulweni wangezansi yezwekazi leAfrica oweSouthern Africa uNkosikazi Vongai Chikwana uthe kumele uhulumende athathe amanyathelo aveze iqiniso ngokunyamalala kukaDzamara.
‘’IAmnesty International ithi kumele kube lephenyo kulokho okwenzakala ku Dzamara, lokhokhelwa nguMahluleli. Iqula leli kumele liphiwe amandla okucubungula ngalokhu njalo"
Uqhubeke wathi labo abazakhethwa ukuthi baphenye loludaba kuzamele bakhulume labantu ababona uDzamara ethunjwa ngoba lokhu kwenzakala libalele, futhi uthe impumela yophenyo lolu kumele yaziswe uzulu.
UNkosikazi Chikwana uthe njalo inhlanganiso yakhe ifuna labo abenza isiga lezi babotshwe bamiswe emthethwandaba njalo uthe labo abazaphenya loludaba kumele bazise uzulu ngempumela .
Osebenza ehofisini kahulumende ebona ngokwethulwa kwemibiko uMnu Richard Mahomva uthi uhulumende ulokhe ephakathi kokudinga uDzamara, kodwa uthi abasoze batshelwe okokwenza yiAmnesty.
“Uhulumende we Zimbabwe uyakhathazeka kakhulu ngokwenzakala ku Dzamara kodwa asisoze sitshelwe okokwenza zinhlanganiso ezifana le Amnesty. Kabasitshiye sense okusemandleni ethu’’
Owake wasebenza loDzamara phansi komzabalazo wokusola umbuso kaMugabe oweOccupy Africa Square uMnu Charles Nyoni uthi wonke muntu ufuna ukuba kwazi okwenzakala kumngane wakhe.
“Sivumelana labo ngoba kabakakhohlwa. Sivuna ukuba sibambane ukuze sibambane ukuze sikhulume ngodaba lolu. Sonke sifuna ukuba kwazi okwenzakala ku Itai’’
Isikhulumeli sebandla leZAPU uMnu Richard Gandari laye uthi kuyadanisa ukuthi eminyakeni phose elitshumi yonke le, lokhe uhulumende engakaphumi lempendulo phezu kokunyamalala kukaDzamara.
“Sifuna ukuba lokhu okwenzakala ku Dzamara kudingisiswe ngoba sonke siyadana ukuba umuntu engaphongukunyamalala mahlayana nje’’
Uhulumende weMelika usanda kwethesa uMongameli Emmerson Mnangagwa labanye bakhe izijeziso zenotho ezintsha ebethesa umlandu wokwephula amalungelo oluntu kanye lokuhuquluza inotho yeZimbabwe.
Kumthetho wakhe wezijeziso zenotho oweZIDERA, uhulumende weMelika uthi njalo uhulumende weZimbabwe kumele ephenye udaba lokunyamalala kukaDzamara labanye ababalisa uPatrick Nabanyama kanye loPaul Chizuze, atsho ukuthi batshonaphi.
Forum