Ubunzima obubangelwa yisimo esibi somnotho kuphazamisa abasakhululayo eZimbabwe, ikakhulu amajaha asakhulayo. Ingcwethi zithi lokhu kuvuselela umkhuhlane wenqgondo kwabatsha obonakala ngendlela ezehlukeneyo.
Ingcwethi kwezempilakahle zithi abasakhulayo bathwele nzima eZimbabwe ngenxa yesimo esibi somnotho.
Zithi abatsha abanengi, ikakhulu amajaha, kabenelisi ukubhekana lobunzima ngoba bucina bubakhulela ngenxa yokuzidla ingqondo bezama ukudinga indlela zokuphila.
Zithi amasiko lawo engeza inhlupho zamajaha ngoba kuthiwa indoda ifela ngaphakathi. Inengi labo kabavezi okubahluphayo okubangela ukuba begule umkhuhlane wengqondo.
Eyinye yalez'ingcwethi esebenza kunhlanganiso yeMental Health Association of Zimbabwe, uMnu Mkhululi Masuku, uthi inengi labasakhulayo ikakhulu amajaha bathwele nzima.
''Kulobunzima bemental health kwele Zimbabwe ngenxa yendubo ezibhekane labatsha. Kumele abantu baqinisele njalo bathole usizo''
UMasuku uqhubeke esithi kunani labantu abalemkhuhlane yengqondo kwele Zimbabwe abanengi babo ngamajaha asakhulayo.
Lokhu kusekelwe ngudokotela wengqondo uCurthbert Zinyama othi inengi labantu kabakwazi ukuba bahlutshwa ngumkhuhlane wengqondo wona athi ulezigaba ezihlukeneyo.
''Umkhuhlane lowu ulezigaba ezehlukeneyo, kwabanye uyabonakala kuthi kwabanye awubonakali kodwa kumele bebone ukuba bayathola ukutshaywa ngumoya njalo bengazisoli.''
Amazwi kaZinyama asekelwe ngenye njalo ingcwethi yezempilakahle uMnu Malvern Dube othi okwenza kube nzima kakhulu yikuthi inengi labantu kalidingi usizo kuseselesikhathi.
Osakhulayo uDumezweni Nyoni uthi njengabatsha bathwele nzima ngoba kabazikhathazi ukuya ezibhedlela uma becabanga okunengi okubakhathazayo.
''Kunzima ukuba abantu bathole usizo ngoba vele inengi alilayo imali yokuya ezibhedlela ukuyadinga usizo.''
Omunye njalo osakhulayo uPascal Nkomo uthi kukalutshwane ukuba abatsha baye ezibhedlela zokuhlolwa ingqondo ngenxa yokuswelakala kwemali.
UDokotela Zinyama ukhuthaza abatsha ukuba bengafeli ngaphakathi nxa belakho okubakhathazayo.
''Kumele umuntu athole umuntu amethembayo amtshel okuhluphayo ukuze elatshwe hatshi ukuvela ngaphakathi.''
Ugatsha luka hulumende olwezempilakahle luthi ebantwini abalitshumi, abathathu bakhathazwa ngumkhuhlane wengqondo.
Forum