Uhlelo lokubhalisela ukuvota luqhubekele phambili ngemva kokuqheliswa kwalo kusukela mhlaka 10 ngoZibandlela okwenze abantu abazinkulungwane ezintathu lengxenye koBulawayo bebhalisa.
Uhlelo lolu lukhangelelwe ukuthi luzagqitshwa mhlaka 8 ngo Nhlolanja.
Ukubhalisela ukuvota kuqhubekela phambili elizweni lonke kodwa indawo ezilokhe zisabhalisa abantu sezizilutshwana.
Idolobho lakoBulawayo selibhalise abantu abazinkulungwane ezintathu lengxenye ensukwini eziyisithupha ezedluleyo.
Ihlandla lokucina leli balibiza ngokuthi yi’Mop Up’ njalo likhangele kakhulu indawo ezilabantu abathole incwadi zokuzalwa kanye lezithupha ngemva kwamahlandla okubhalisa akuqala.
UDistrict Elections Officer wenhlanganiso ebona ngezokhetho eyeZimbabwe Electoral Commission (ZEC), uNkosikazi Sithembiso Khuphe, uthe bayajabula kakhulu ngoba inani labantu ababhalisayo kuhlandla leli ngabasakhulayo kanye lalabo abazalelwa eZimbabwe kodwa belabazali abazalelwa kwamanye amazwe ababiza ngokuthi ngama aliens.
UNkosikazi Khuphe ugcizelele wathi ngaphansi kohlelo lolu basebenzisa imitshina elitshumi lane kuphela koBulawayo.
Inhlanganiso ezimeleyo eyeVIctory Siyanqoba ikhuthaza uzulu ukubhalisela ukuvota ngenkondlo lezingoma. Umqondisi weVictory umnumzana Desire Moyo uthi imfundiso yabo iyakhuthaza abantu ukuthi bayebata njalo bayenelisa ukuhuga abantu ukuthi babhalise.
Isakhamuzi sakoBulawayo unkosikazi Siphosenkosi Hlalo uthi selungele ukuvota njalo sewabhalisa. Uthe ukwengezelelwa kwamalanga okubhalisela ukuvota kulinyathelo elihle kodwa indawo zokubhalisela sezilutshwana njalo zikhatshana kulabo abafuna ukubhalisa ikakhulu abangela mali zokugada.
KoBulawayo sekubhalise abantu abangaphezu kwenkulungwane ezimbili inani elingaphansi kwalelo elikhangelelwe ukubhalisela ukuvota. Ukubhalisela ukuvota kuzaqhubekela phambili ngemva kukamhlaka 8 ngo Nhlolanja kuze kuyemiswa ngemva kokubhalisa kwamagama kwalabo abazancintisa kukhetho. Ababhalisela ukuvota kuyabe sekumele bahambe bayebhalisa emahofisini aweZEC.
