Sokuvele imifanekiso yenqwaba yezidumbu ezisemgodini lapho okuvaleleke khona otsheketsha kugoqela labe Zimbabwe eStilfontein kweleSouth Africa.
Imifanekiso le ephume kulomgodi lomunye wabotsheketsha osanda kuhlengwa itshengisa inqwaba yezidumbu zabotsheketsha asebefile.
Inengi yezidumbu lezi ezifakwe emaphepheni eplastic zitshengisa sobala ukuthi sezisonakala kanye lokuthi otsheketsha laba bafe kabuhlungu. Kule imifanekiso omunye wabotsheketsha ongavezwanga igama ubonakala ehamba etshengisa izidumbu ezinengi okwesikhathi eside esebenzisa umakhalekhukwini wakhe. Ucina ngokuncenga esithi bacela ukuxhaswa ngokudla lokuhlengwa ngesiphangiphangi.
“Siyaqala ukulibonisa abantu laba abafileyo emgodini. Owokuqala nangu. Lo ngomunye. Yibonalaba. Omunye nangu baningi kakhulu. Liyababona naba, sicela usizo.”
Imifanekiso yezidumbu lezi isitshiye inhlanganiso ezilwela amalungelo abasebenza emgodini zizonde zigan’unwabu.
Lezi inhlanganiso ezigoqela eyeMining Affected Communities United In Action zethesa uhulumende lamapholisa umlandu wokubulala otsheketsha laba.
Igqwetha lezamalungelo uMnumzana Mametlwe Sebei uthi kudala bexwayisa uhulumende ukuthi akaphe lababantu ukudla njalo abahlenge ngesiphangiphangi kodwa yena wakhetha ukwephulela izikhuni endlebeni.
"Asila kuthandabuza ukuthi lo ngumbhuqazwe wokubulawa kwabotsheketsha laba ngesihluku esikhulu okwenziwe nguhulumende. Izenzo zikahulumende ezigoqela ukwenqabela ukuthi lababantu baphiwe ukudla lamanzi yizo ezibe yimbangela enkulu yokufa kwabotsheketsha laba.”
Kodwa-ke isikhulumeli sogatsha lwendaba zemigodi uMnumzana Makhosonke Buthelezi walile ukuthi uhulumende ubangele ngabomo ukufa kwabantu esithi bekusenziwa amalungiselelo okubahlenga.
“Akusikho ukuthi uhulumende weNorthwest ubengafuni ukuhlenga otsheketsha laba. Ukutshilo ngaphambilini ukuthi ubesadinga imali kanye lokwakha uhlelo lokubahlenga.”
Kulezizalwane zeZimbabwe ezinengi eseziveze ukuthi zilezihlobo zazo eziphakathi kwal’umgodi weStilfontain. Kusenjalo, abazohlenga otsheketsha laba baqalile umsebenzi wabo emini yantambama benelisa ukuhlenga ihlekana labotsheketsha baphuma njalo lezidumbu ezingaphansi kwezilitshumi.
Forum