Umkhokheli webandla leAfrican National Congress (ANC), uMnumnzana Cyril Ramaphosa, usephinde wagcotshwa njalo ukuba ngumongameli wakwele South Africa, emkhosini oqhutshelwe ePitoli ngoLwesithathu.
Izizalwane zeZimbabwe zithi zikhathazekile ngokungazi ukuthi zizaphathwa kanjani phansi kukahulumende womanyano okhokhelwa nguRamaphosa.
UMongameli Emmerson Mnangagwa ngomunye wenkokheli zamazwe ebezisemkhosini wokugcotshwa kuka Ramaphosa emahofisini kahulumende eUnion Buildings ePitoli. URamaphosa ukhokhela uhulumende womanyano obunjwe ngemva kokhetho olusanda kuqhutshwa kwele South Africa.
Ibandla lakhe lehluleke ukuthola amavoti eneleyo obekuzakwenza ukuthi libumbe uhulumende lizimele. Libumbe uhulumende womanyano lele Democratic Alliance, Inkatha Freedom Party kanye lePatriotic Alliance. Lokhu ngokwakuqala ukuba kube lohulumende womanyano selokhu ilizwe leli lathola uzibuse ngomnyaka ka1994.
Uhulumende omutsha lo uselethe imibuzo, ukwesaba, lokungahlaliseki kuzizalwane zeZimbabwe ezihlala lokusebenza kwele South Africa. Lobanje abanye bekholwa ukuthi abantu bokuza bazaphathwa ngcono phansi kukahulumende womanyano, abanye bathi balovalo ngoba phakathi kwalo umanyano zikhona inkokheli esezikuveze kwacaca ukuthi azithakazeleli abantu bokuza. URamaphosa uthembise uzulu ukuba uzabusa ngemfanelo
Uhulumende wakhe ubeveza kungakenziwa ukhetho ukuba kabathakazeleli abadabuka eZimbabwe abalamaphepha eZimbabwe Exemption Permits. Babefuna ukuthi basuswe kulelolizwe angaphelelwa yisikhathi sokusebenziswa amaphepha la. Kodwa lokhu kukhanya sokuvinjwa ngumthethwandaba weConstitutional Court. Umgcinisihlalo webandla leDemocratic Alliance eliyingxenye wehulumende yomanyano, uNkosikazi Helen Zille, usanda kutshela abezindaba ukuthi akavumelani lokwakusenziwa nguhulumende kaRamaphosa.
“Sikholwa ukuthi izizalwane zeZimbabwe ezaphiwa amaZEP kufanele ziphiwe ubuzalwane bakwele South Africa ngoba kudala belapha njalo sebenze okukhulu ekuthuthukiseni umnotho wethu.”
Abanye bathi balovalo ngomkhokheli webandla lePatriotic Alliance uMnumnzana Gayton Mckenzie laye oyingxenye yalo umanyano, yena ofuna bonke abaselizweni ngokungekho emthethweni bakhitshwe ngokuphangisa elizweni.
“Sizasebenza yiloba ngubani ovumelana lathi ukuthi abokuza bonke abangelamvumo yokuba kwele South Africa abahambe.”
Bakhona njalo abakhathazeke ngenkulumo yomkhokheli webandla le Inkatha Freedom Party, uMnumnzana Velenkosini Hlabisa, lanye oyingxenye yalo umanyano.
“Siyakhathazeka ngendlela uhulumende aphatha ngayo udaba lwabantu bokuza njengoba besekelwanje bengena santando elizweni emingceleni evuzayo.”
Zonke lezi inkulumo leziphakamiso ezivela kuhulumende womanyano sekulethe ukukhathazeka kuzizalwane zeZimbabwe. Umgcinisihlalo wenhlanganiso yePhoenix Foundation, uMnumnzana Dumisani Nleya, uthi bamadolo nzima.
“Abantu ababuya elizweni laseZimbabwe ngicabanga ukuthi abasoze bebebesaphephile ma kungenzanga ukuthi banikeze lesi sikhundla sokuphatha ezangekhaya enhlanganweni efana lePatriotic Alliance. Ngibona sengathi abantu beZimbabwe bazathwala nzima kakhulu.”
Umgcinisihlalo weZimbabwe Progressive Foundation, uMnumnzana Lance Mlilo, laye uthi besaba uMckenzie.
“Wathi akabadingi abantu beZimbabwe udinga iministry yeHome Affaires leyamapholisa eyiyo okufanele ukuthi izopusha kakhulu abantu beZimbabwe. Sizabona imass deportation ikakhulu abantu beZimbabwe ngicabanga ukuthi yibona abatagethwe kakhulu.”
Kodwa-ke iqgwetha elibona ngelungelo likazulu, uMnumnzana Vusumuzi Sibanda, uthi luhulumende kufanele alalele okutshiyo nguNkosikazi Zille kudaba lwamaphepha eZEP aphiwa izizalwane zeZimbabwe.
“Uma ngibhekile ngibona engathi okubalulekile yikuthi uhulumeni omutsha singamkhuthaza ukuthi abantu beZEP kabanikezwe ubuhlali ibe yindaba ephelile ivaliwe ngoba yilokho okwenziwa naseAngola, ngoba uma kungenjalo kuzabonakala sengathi umthetho usebenza ngendlela ehlukile kuzimo ezifanayo.”
Kukhangelelwe ukuthi uRamaphosa uzakhetha amalunga edale labaphathintambo kahulumende okulinyathelo elizacacisa loba abakwamanye amazwe bazaphiwa amaphepha okuba selizweni ngokusemthethweni kumbe bazadudulwa
Forum