Ngesikhathi ilizwe linanza ilanga lamalungelo ka zulu ngoLwesine umanisipala wedolobho le Harare udilize izindlu zemuli ezingafika amatshumi amahlanu duzane lemzini we High Glen.
Inhlanganiso ye Harare Residents’ Trust isole kakhulu lesi sehlakalo isithi siza ngesikhathi sezulu abantu bengela lapho abangaya khona.
Kubikwa kudilizwe izindlu ezifika amakhulu amabili.
Umanisipala uthi wapha abantu abakha kulindawo inyanga ezimbili ukuthi badinage okokuya.
Izitanda zokwakha izindlu lezi zathingiselwa uzulu zinhlanganiso ezithiwa yi Stars lenye ethiwa yi Teurai Ropa Cooperative ezazakala ngokusekela ibandla le Zanu PF.
Umanisipala uthi abantu laba bakhe izindlu endaweni engavunyelwayo.
Kodwa inhlaganiso ezilwela ilungelo loluntu zisole kakhulu inyathelo leli zisithi ngabe umanisipala eqale wadingela indawo zokuhlala imuli lezi engakadilizi izindlu zabo.
Sixoxe lokhansila wedololobho leHarare uMnu. Peter Moyo ukuze sizwe okunengi ngaloludaba.
UMoyo, ongukhansila womuzi we Southerton engowebandla le MDC-T, uthi mpela kumele izindlu lezi zidilizwe ngoba zakhiwa okungekho okusemthethweni.
“Abanye bakha phansi kwencingo zamagetsi, abanye bakha eduze lezifula. Ikhansili kayisoze ibukele kusonakala kanje,” kutsho uMoyo.
UMoyo uthi akumelanga abantu bephongukukwakha mahlayana lalapho okugelezela khona umfula.
“Into ekhona yikuthi uhulumende kabone ukuthi abantu bakhe bonalaba abamsekelayo kabalandele umthetho,” kutsho uMoyo.
