Izizalwane zeZimbabwe kweleSouth Africa sezisungule inhlanganiso yokuqoqa uxhaso oludingwa yizizalwane zeZimbabwe impilo yazo esibhidlizwe yibunzima obulethwe yikuqhamuka kwegciwane lecoronavirus.
Inhlanganiso le ebizwa Zimbabweans United for Progress igoqela osomabhizimusi, abezombusazwe, amagqwetha labantukazana abadabuka eZimbabwe.
Obona ngezemithetho kule inhlanganiso umnumnzana Vusumuzi Sibanda, uthi inhloso esemqoka yikuqoqa uncedo oludingwa ngabeZimbabwe esebehlupheka ngenxa yenhlupho ezidalwe yicoronavirus.
“Abantu abanengi kakhulu abatholi ukudla kanti nalabo okufanele ukuthi ngabe bayathola usizo kusuka kuhulumeni walapha eSouth Africa kabalufinyeleli ngoba beyizizalwane eziphuma ngaphandle kwelizwe.”
Umnumnzana Sibanda uthi banengi abeZimbabwe abalokhu bacina ukusebenza ngesikhathi kusethulwa uhlelo lokuvalelwa ezindlini ngoMbimbitho. Uthi lokhu sekubatshiye belambile, bengelamali yokuthenga ukudla lokubhadala imithelo yezindlu abahlala kuzo.
Uthi lobanje abanye sebebuyele emsebenzini banengi abalokhu bengakavunyelwa ukubuyela emisebenzini. Laba bagoqela izinkulungwane zabeZimbabwe abasebenza endaweni zokudlela, emahoteleni, kwezokwakha lezindlini zabelungu.
USibanda uthi inhlanganiso yabole iza kuyadinga usizo kwabapha uncedo lwemali, olokudla, olwezamabhizimusi laloba kungaphi abangathola uncedo oludingwa yizizalwane zeZimbabwe lezi.
“Injongo yale inhlanganiso ebizwa Zimbabweans United for Progress kuyinhloso yokuvuselela ezomnotho elizweni laseZimbabwe kusuka ebantwini abangaphandle ngokubasiza ukuthi babelandlela eyokuthatha ulwazi lonke asebethe baluthola eminyakeni baluphindisele eZimbabwe.”
Umgcinisihlalo wenhlanganiso yeZimbabwe Community in South Africa umnumnzana Ngqabutho Mabhena uthi bemukela ngezandla zombili loluhlelo. Uthi inengi labeZimbabwe laba abasenelisi ukuziphilisa bona lezihlobo zabo ezisekhaya.
“Siyakwamukela ukuthi izizalwane zeZimbabwe ziqoqane ngesikhathi lesi esinzima seCovid-19. Siyananzelela ukuthi silabantu abanengi abadinga ukuncediswa ngokudla, iUIF. So, ke imizamo yonke eyokuthi abantu baqoqane siyayamukela kakhulu.”
Ngakolunye uhlangothi ilunga leZapu umnumnzana Carnicious Nkala, uthi bakhathazekile ngokuthi inengi lamabandla ezombusazwe lenhlanganiso zomphakathi ezidabuka kweleMandebeleni azinxuswanga ukuba yingxenye yaloluhlelo.
“Inkokheli okukhulunywa ngazo angikholwa ukuthi ziyakwazi ukuthi kwenzakalani eHilbrow, eYeovile, eCapeTown. Angikholwa futhi ukuthi amabandla abawafakileyo laphana yiwo wodwa njalo yiwo alamanumber abantu abakhona kulendawo. I idea yona inhle kodwa ngendlela abayifake ngayo angiboni kuzophumelela lokho.”
Kodwake inkokheli zale inhlanganiso zithi kayisoke ithathe hlangothi njalo izasiza wonke umuntu weZimbabwe kungakhathalekile ukuthi uvela kusiphi isabelo.