Ibandla eliphikisayo ele Zimbabwe First lithi lizakusa emthethwandaba elinye ibandla elisanda yethulwa okusemthethweni ele People First elikhokhelwa nguNkosikazi Joice Mujuru lilethesa icala lokutshontsha igama lalo.
Ibandla leZimbabwe First likhokhelwa nguMnu. Maxwell Shumba ohlala ngapha kweleMelika. Sixoxe lomgcinisihlalo wabesifazane, uNkosazana Thabi Ncube othi bafuna umthethwandaba umise ibandla likaMujuru ukusebenzisa igama lokuthi People First.
“Ibizo lephathi nxa ngingakhuluma ngelizwi eliqatha ngingathi kahlekahle ibizo leli ngelethu thina iZimbabwe First ngoba nxa sikhangela imbalo yebizo yona yiZimbabwe First, Country First le People First,” kutsho uNcube.
Uthi njalo ibandla le People First kalikethulwa okusemthethweni bona sebelisebenzisa lelo gama.
Siphinde saxoxa lesikhulumeli sebandla le People First, uMnu. Rugare Gumbo othi vele lolu ludaba oluzalahlelwa khatshana ngumthethwandaba ngoba bona balobisa igama labo ngokusemthethweni.
“Hayi asithathanga bizo labantu thina siyi Zimbabwe People First. Sarejesta kuZEC abe ZEc bathi khona hayi akula enye iparty elebizo lonalelo,” kutsho uGumbo.
Wengezelele esithi abakhuluma ngebizo leli ngabathi ngama slogan kodwa wathi ama slogan kawalamsebenzi ngoba wonke umuntu engasebenzisa islogan ayifunayo.
UGumbo uthi amabizo la kawasoze aphazamise abantu lapho bevota.