Umhlangano wakuqala phakathi kwenkampani yamandla kagetsi eyeZimbabwe Power Company lomphathintambo wezamandla emililo etshiyeneyo, izakhamizi zakoBulawayo, amakhansila kunye loSibalukhulu wedolobho, uNkosikazi Judith Ncube ube lokufuthelana okubangele ukuba abanye bakhalale baphuma ungakapheli.
Lokhu kubangelwe yikuba inkampani yeZPC iqhubekela phambili ekufuneni ukudiliza imiphongolo emibili edolobheni leli ingavumelananga lomanisiphala kanye lezakhamizi.
USibalukhulu wedolobho lakoBulawayo uNkosikazi Judith Ncube laye ubengazi ngohlelo lokudiliza imiphongolo emibili uveza imibono yakhe.
"Umhlangano uhambe kuhle sizathola indlela yokusebenza ndawonye, akukaphumi kuhle sizakhulumisana uMinister uzafika ewofisini kaMayor bakhulumisane ukze kudinwe iwayforward.''
UMphathintambo wezamandla kagetsi, uMnu. Fortune Chasi uthi bazaqhubekela phambili bekhulumisana lezakhamizi leKhansili ngohlupho olukhona.
“Siyaphuma lapha sibatshengisa ukuba lapha kumi njani singalungisa lapha singathola amamegawatts angu60, siyabe silokhe sikhuluma sizaze sivumelane iZPC ixolisile. Ngilusizi baphumile emhlanganweni ngizamdinga uMayor sikhulumisane.''
Umgcinisihlalo wenhlanganiso yezakhamizi eyeBulawayo Residents Association, uMnu Winos Dube uthi uBulawayo kavumelani lokudilizwa kwemiphongolo emibili.
“Abantu abakuvumi ukuthi imiphongolo idilizwe ngoba abantu abatshelwanga batshengiswa ukuba isizatho yini thina sikhalela ingqubekela phambili. Abantu bafuthelene ngoba kunengi osekudiliziwe kwangaphutshi koBulawayo njalo abatshelwa ukuthi yini eyenzakalayo."
Isakhamuzi sakoBulawayo, uMnu Rasha Ndlovu ukhuluma ngembali yalapho okulemphongolo lezi.
“Akuladlozi elake labulawa ukuyidiliza kuzangena omunye omoya ongalunganga koBulawayo. Lindawo ilembali yesiko lethu."
Esinye isakhamuzi sakoBulawayo uNkosazana Marble Ngwenya uthi bayazi iphansi kukaKhansili imiphongolo le.
“Sazi imiphongolo ingaphansi kwekhansili, kuzahamba njani ukuthi iZPC idilize indawo yekhansili njalo thina njengezakhamizi abakasitsheli kumele baze kuwowonke amaWard njalo lembali yethu asifuni idilizwe lozulu engazi."
Unobhala jikelele weBulawayo Progressive Residents Association, uMnu Melusi Moyo uthi lokhu akubaphathi kuhle.
“Lokhu akusiphathi njengezakhamizi zakoBulawayo, ngoba lindawo iyinsika yamasiko ethu njalo akuzange kubelenhlonipho, inyathela elithethwe nguhulumende alisiphathi kuhle njengezakhamizi zakoBulawayo."
Inkampani yeZPC ithi ikhangelele ukudiliza imiphongolo emibili njalo baphakathi kokudinga inkampani engayidiliza imiphongolo bethi sebefaka imitshina yakulezi insuku yokugaya amandla kagesti.
Uhlelo lwemitshina le, lukhangelelwe ukuthatha iminyaka edlula emibili njalo ibhanga leIndia yilo elikhangelelwe ukuphatshia ngesikwelede samadola eMelika edlula inkulungwane ezilikhulu.
UChasi uxolisile kuMayor Mguni, uSibalukhulu wedolobho lozulu, ngokwenza kwabeZPC, ukungaqalanga bakhulumisane loBulawayo andubana basungule uhlelo lwabo lolu.
Okwamanje iBulawayo Power Station igaya amandla kagesti angamatshumi amathathu amaMega Watts njalo bakhangelele ukuthuthukisa bapheke amatshumi ayisifica munwe munye.
