Inengi lithi ilanga lokunanza isivumelwano sebandla le PF ZAPU leZANU ngomnyaka ka 1987, ele Unity Day, alisoze libe lesithunzi esifaneleyo nxa udaba lweGukurahundi lungahluzwanga njalo kwabalembadalo kulabo abathinteka kulesi isehlakalo.
Kubikwa kwabulawa abantu abedlula inkulungwane ezingamatshumi amabili, 20 000, eMidlands leMatabeleland ilizwe lisanda ukuthola uzibuse, okwabangela ukuthi owayengumkhokheli we PF ZAPU umuyi uMnu. Joshua Nkomo kanye lowayengumongameli njalo ehola ibandla leZANU uMnu. Robert Mugabe belobelane lesi isivumelwano eseUnity Accord, esabumba ibandla leZANU PF.
Sixoxe labahlali bakoBulawayo ukuzi sizwe imbono yabo ngaloludaba. UMnumzana Lungani Ndebele uthi ukubambana lokhu akusikho kweqiniso.
UMnumzana Sox Mabhena uthi lolusuku sokulikhefu nje elokuziphumulela.
Abanye, abanjengoMnu. Thabani Moyo, bathi lolusuku ngolokukhumbula imphefumulo eyalahleka ngesikhathi sombhuqazwe njalo kufanele abonayo bevume abakwenzayo.
Ukuhlaziya loludaba, sixoxe loMfundisi Useni Sibanda, owenhlanganiso yeZimbabwe Christian Alliance, yena othi usuku lolu luqakathekile ngoba lwaletha ukuthula elizweni.
Lonyaka ngumnyaka wesibili ilizwe lingenzanga umkhosi omkhulu owokunanza lelilanga. Abanye bathi banengi abangaziyo izizatho ezabangela ukuthi kube le Unity Accord ngoba uhulumende wakufihla lokhu kusukela ekuqaleni.