Amabandla aphikisayo athi ukhetho oluzakubakhona lonyaka alusoze lube lukhululekile ngenxa yesimo sezombangazwe esikhona elizweni okwamanje.
Lokhu kukhulunywe emhlanganweni obuhlaziya ukuba ilizwe lilungiselele na ukhetho olukhululekileyo olulempumela engasoze iphikiswe na uqoqwe yinhlanganiso ye Public Policy Research Institute of Zimbabwe (PRIZ).
Amabandla akumanyano we People’s Rainbow Coalition aphume lezikhalazo ezimbalwa athi okumele zilungisiswe andubana ukhetho lwenziwe.
Isikhulumeli sebandla leZAPU, uMnu. Iphithule Maphosa, uthi ilizwe leZimbabwe ligcwele udlakela njalo ibutho yilo eseliphethe intambo zombuso.
Uthi ibandla elibusayo eleZANUPF kusukela kudala alikaze lifihle ukuthi lisebenzisa ibutho, amapholisa kanye lezinye ingatsha zikahulumende ukwethusela abantu ukuze balivotele.
UMaphosa uqgibe ngokuthi kumele njengamabandla aphikisayo baphoqe uhulumende ukuthi aqondise imithetho ekhangela ukhetho, kunxuswe inhlanganiso ezizimeleyo ezifana le African Union ukuthi zizohlola ukhetho.
Uthi bekumele njalo lezinhlanganiso zinxuswe ukuthi zizokhangela uhlelo lokubhalisela ukuvota olugqitshwe kuyonale iviki.
UMaphosa uthi kumele uluhlu lwamabizo abantu ababhalisele ukuvota lunikezwe amabandla aphikisayo masinyane kuthi amaphephandaba kanye lemisakazo kahulumende inikeze amabandla aphikisayo isikhathi esifanayo.
Isikhulumi somanyano wePRC, uMnu. Methuseli Moyo, uthi umumo okhona khathesi wehlukile ngoba into ezazisenzakala kuqala nxa kulokhetho zazisenzakala ngaphansi kombuso womuntu ongasobutho (civilian rule) owayesebenzisa ibutho, ethi khathesi ibutho yilo eselibusa ngakhowonke umuntu ngitsho lamapholisa aphilela evalweni.
UMoyo wengeze wathi uMongameli Mnangagwa ufaka umumo omubi wokhetho ngokuthethisa abantu abamabandla aphikisayo esithi ngolimi lwesiShona bayiZimbgasungata okutsho ukuthi yiMgodoyi ngesiNdebele ethi lokhu kwenza ukuthi abantu balwe.
Umqondisi wenhlelo zenhlangiso eqoqe lumbuthan, eye PRIZ, uMnu. Sidumo Bhebhe, uthi njengoba sebehluzile babona ukuthi ukhetho alusoze lube lukhululekile nxa kungaqondiswanga imithetho sebezakusa uduba lolu enkantolo ukuze kungakhalwa nxa sekonakele.
Ukhetho lukhangelelwe ukuba khona enyangeni kaNtulikazi kodwa seluqalile udlakela emabandleni ezombusazwe.
Kuviki ezimbili ezidluleyo uMongameli wePRC uNkosikazi Joyce Mujuru labasekeli bebandla lakhe batshaywa ngabasekeli bebandla le Zanu PF, abanye babo babotshwa.
