Kuhlelo lwezizalwane zeZimbabwe ezihlala emazweni ngoLwesithathu sixoxe loNkosikazi Ester Nyambi wenhlanganiso yeZimbabwe Vigil yabatshengisela ezitaladini zeBhilithane bekhonona ngokwenziwe nguDokotela Sylvester Nyatsuro osethathela uMnu. Phillip Rankin ipulazi lakhe eMashonaland Central.
UNkosazana Nyambi uthi bazatshengisela uDokotela Nyatsuro aze athathelwe isithupha sokusebenza eBhilithane.
Uthe inhlanganiso yakhe "ifisa ukuthi udokotela lo athwaliswe nzima eBhilithane nguhulumende labantu makhaza."
Udokotela lo, esingenelisanga ukukhuluma laye, utshele amaphephandaba eBhilithane ukuthi uthatha ipulazi leli okusemthethweni.
Abasebenza loMnu. Stephen Pearson, igqwetha elimmela uDokotela Nyatsuro, bathe usacubungula udaba lolu.
Izihlobo labangane baka Dr. Nyatsuro kubikwa ukuthi bahlukuluza uRankin ukwenzela ukuthi aphume epulazini leli.
