Lanxa izizalwane zeZimbabwe zisithi ubumunyu kakhulu umnyaka ka2024, inengi lithi zinengi njalo zinkulu izifiso abalazo ngomnyaka omutsha.
Isizalwane seZimbabwe uNkosazana Sharon Dube osebenza kweleSouth Africa uthi isifiso sakhe somnyaka omutsha ngesokuthi abengusomabhizimusi omkhulu ohloniphekayo.
“Happy! Happy! Happy New year! Uphelele u2024.Ngiya wisher ukuthi u2025 ma eqala umuntu aziqalele ibhizinesi yakhe njengoba nje sisemazweni siqalenje ibhizimusi elizohamba kahle. Si thi Happy! Happy! New year kuye wonke umuntu.”
Umlobi wezingwalo zesiNdebele uNkosazana Mercy Mvundla uthi phezu kwenhlelo alazo ezokuqhubeka eloba emnyakeni omutsha, ufisa kube ngumnyaka wenguquko enhlalweni yabeZimbabwe abasebenza kweleSouth Africa.
“Siyafisa futhi lokuthi njengabantu abaphandle kwelizwe, ikakhulukazi ngendaba yedocumentation ukuthi sikwazi ukuthi sithole amaphepha aright abantu bahlale ngokukhululeka ngoba njengamanje wonke umuntu akahlalisekanga. Asikutholi ukuphumula.”
UMnumzana Rambo Sibanda odabuka eBhubhude eTsholotsho kodwa osebenza kweleSouth Africa uthi ufisa kube ngumnyaka wokulunga kwesimo ekhaya.
“Kungathi ilizwe lakithi lingabuya libuyele esimeni salo sakudala sikwazi ukuthi sibuyele siyelithuthukisa ngayonale imisebenzi esiyenzayo kuleli elaseSouth Africa. Ma kungabe kuyenzeka sithole lawo mathuba ukuthi sikwazi ukuthi siyenze imisebenzi kwelakithi lokuzalwa.”
UNkosazana Sharon Ndlovu obesekhaya ngesikhathi seKhisimusi uthi emnyakeni omutsha ufisa uhulumende alungise umgwaqo osuka eBeitbridge usiya koBulawayo ngoba abanengi baphelelwa zimota lempilo zabo kulo umgwaqo.
“Kuhamba kanjani ukuthi singabi lomgwaqo phezu kwemali engaka esiyikhipha eborder. Mina ngizakhulumela eyami imoto encane .engikhuluma ngayo ukuthi ifile. I TIP bangibhadalise R950, iZimra R500, igate pass R180. Imali zethu zonalazi esizibhadalayo ziyangaphi zingalungisi umgwaqo.”
Usomabhizimusi eJohannesburg uMnumzana Dan Maphalala Mabunda uthi umthandazo wakhe omkhulu ngowokuthi kube ngumnyaka wokuqeda umkhuba wokubulala mahlayana abantu emhlabeni jikelele ukuze kuvikelwe impilo zabantu ikakhulu emazweni ancindezela amalungelo oluntu.
“Ngifuna ukuthi kube notshintsho ku United Nations after ngibone into eyenzekala eGaza abantu bebulawa. And ngibona abantu bebulawa endaweni ezinengi kubo Mozambique. Akukho muntu okhulumayo. Okutsho ukuthi kunabantu abakhethiwe okuyibo abaprotectwa yi United Nations. Abanye bonke abekho protected. Nalana eSouth Africa asikho safe unless silungiselento. We must be protected emhlabeni wonke jikelele.”
Amaphupho enengi lentsha abalisa ukuphumelela ezifundweni, ukugava ulwazi lwamakhono atshiyeneyo kanti abanye bafuna ukwenda lokuthathwa ngo 2025. Inengi labasemazweni bathi bafisa ukwakha imizi ekhaya kuthi labo abathanda impilo yemadolobheni bafisa ukuthenga izindlu ezibiza bona. Abathanda ezombusazwe bathi bafisa u2025 abaphathele ibandla lezombusazwe elitsha elizabalethela inguquko okukade bayikhalela eZimbabwe.
Forum