Umnumnzana Batiraishe Henry Mukonoweshuro isiphathamandl sehofisini yommeli weZimbabwe kwele South Africa utshele iStudio 7 ukuthi uphakathi kokwethekelela indawo ezitshiyeneyo elizweni esazisa abeZimbabwe ngoncedo abangaluthola ehofisini yakhe.
Ekhuluma esepulazini leJohannesberg eLimpopo, lapho okuxotshwe khona phose ikhulu lezizalwane zeZimbabwe, uMukonoweshuro uthe umnyango wehofisi yakhe uvuliwe ukusiza yiloba ngubani oweZimbabwe odinga usizo.
IConsulate yiyo epha abantu incwadi zeZimbabwe abazidinga bengapha kweleSouth Africa. Yemukela njalo izicelo zamaphasipoti amatsha kanye lokusiza abadinga ubufakazi bokuthi incwadi zeZimbabwe abaziphetheyo ngezeqiniso. Siyapha njalo incwadi zokuzalwa kanye lokuphathisa abafuna ukutshada beseSouth Africa kanye labafuna ukuguqula amazenge okutshayela ehambelana lokufuneka kuleli. Amahofisi ethu avuliwe ngoMvulo, Ngolwesibili, ngolweSine langolweSihlanu.
UMukonoweshuro uthi baphakathi kokuloba ugwalophephandaba oluzafinyelela izizalwane zeZimbabwe endaweni ezitshiyeneyo kweleSouth Africa ukuze zithole ulwazi ngezinto ezitshiyeneyo ezibahluphayo. Ethi inani labeZimbabwe ababuyiselwe emuva nyakenye ngenxa yokungabi lencwadi zokuba selizweni ezisemthethweni lifike kunkulungwane ezilitshumi lane (14,000). Wakhuthaza izizalwane zeZimbabwe ukuthi zibe lamaphepha okuba kwele South Africa ngokusemthethweni.
Sihlala sikhathi sonke sikhuthaza izizalwane zeZimbabwe ukuthi zibe lamaphasipoti lamapermit okusemthethweni ukuze bengabotshwa bephindiselwe ekhaya. Kulosisi ukuthi inengi lezizalwane zeZimbabwe lizifaka ehlustheni kweleSouth Africa ngenxa yokoma kwezomnotho ekhaya.
Uqhubeke ethi uyakhathazeka kakhulu ngenani lezizalwane zeZimbabwe ezifela kweleSouth Africa njengoba kusiya phela u2015 bekuphindela ekhaya izidumbu ezedlula amakhulu amabili ngenyanga.
UbeseLimpopo uMukonoweshuro esiyasizana leziZalwane zeZimbabwe eziphose zifike ikhulu ebezixotshwe mahlayana epulazini leJohannesberg eLimpopo zabhaxabulwa kabuhlungu. Ukungenela kwakhe kusize ukukhulumisana lekhansili yeLimpopo eyiyo ecine isitholela abaxotshiweyo laba indawo yesikhatshana.