Ezinye iziphathamandla zebandla leMDC-T sezisole ukutshengisela kwangoMgqibelo ngoba lelibandla lingaphiwanga ithuba lokwethula amazwi alo njengokuzenziwa yiziphathamandla zebandla leZANU PF. Uluhlu lwabazakhuluma olwethulelwe uzulu lutshengisa ukuba izikhulumeli zizavela kunhlangothi zebandla leZANU PF kuphela.
Esinye isiphathamandla sebandala leMDC-T, uMnu. Charlton Hwende ulobe enkundleni ye Facebook ukuthi kathakazeleli okwenziweyo njalo kwenza engafuni ukuyatshengisela labanye.
Abaqoqa ukutshengisela lokhu bebethe banxusa wonke umuntu kungakhathalekile ukuthi ungowebandla liphi.
Kusenjalo, izizalwane zeZimbabwe ezihlala kwamanye amazwe zithi lazo ziyatshengisela ngendlela ezitshiyeneyo emazweni ezikuwo ngendlela yokuxhasana labasellizweni abafola lamuhla eHarare lakwamanye amadolobho bekhalaza ukuthi umongameli Mugabe atshiye umbuso.
Izizalwane zezimbabwe lezi zifola emadolobheni atshiyeneyo asemazweni agoqela eleSouth Africa, London, kanye leUnited States.
USithandekile Mhlanga weStudio 7 uxoxe loNkosikazi Tsitsi Chirisere, omunye wabaqoqe lokhu ukutshengisela edolobheni leNew York kweleMelika.
UNkosikazi Chirisere ugcizelele ukuthi izizalwane zeZimbabwe ezihlala kwamanye amazwe zifuna ukuthi umnotho welizwe ulungiswe zibuyele ekhaya.