Inhlanganiso yezisebenzi eyeZimbabwe Congress of Trade Unions (ZCTU) ithi usuku lokunanza imisebenzi yabantu abasebenza imisebenzi etshiyeneyo kalusafani lakudala ngoba kulabantu abanengi okumangalisayo abancindezelwa ngabaqhatshi.
IZCTU ithi sesifikile isikhathi sokuthi baqoqane kulandela ukubhudlika komnotho weZimbabwe okubatshiye bemaqamuqamu.
UMnu. Elijah Mutemeri, isiphathamandla seZCTU, uthi loba kunjalo bazathakazelela usuku lwezisebenzi ngoLwesibili olulesihloko esithi ‘We Are At Cross Roads, Arise And Organize, Do Not Mourn.’
Izisebenzi ezingengi ziyakhala ngokwenzakala eZimbabwe lapho eziphethwe kubi ngabaqhatshi.
UMnu. Austin Muswere, unobhala jikelele wenhlanganiso emele izisebenzi zemapulazini eyeGeneral Agriculture and Plantation Workers’ Union, uthi amalunga abo athwele nzima.
Lokhu kusekelwe ngunobhala jikelele weZCTU, uMnu. Japhet Moyo, othi kuqakathekile ukuba uhulumende weZimbabwe ananze izisebenzi ngesikhathi edinga abantu abangavula amafekithali kwele Zimbabwe.
