Sokuleminyaka ethoba minwembili uzulu ebambe umhlangano wePeople’s Convention wokulungisisa umumo wezombusazwe abawufunayo lokhe kungakabi lokunengi okukhanyayo kugcwalisa izifiso zabo.
Lumhlangano ongenwe yinhlanganiso ezizimeleyo labantu makhaza uphume lezibopho ezikhuthaza ukunanzwa kwamalungelo oluntu lokuqutshwa kokhetho ngendlela ecacileyo kungela dlakela lokuhlukuluzwa kwabantu.
Umnumzana Nixon Nyikadzino okhokhela imisebenzi yenhlanganiso eyaphatheka ngokugcweleyo kulumsebenzi eye Crisis Coalition uthi benelisa ukuthola ukuthize okufana lesisekelo sombuso esitsha noma kusase kunengi okumele kwenziwe ngoba noma leso sisekelo sisihle sile Bill of Rights enhle abantu abakenelisi ukuwakholisa lawo malungelo:
Ocubungula ezombusazwe umnumzana Masimba Kuchera uthi into eqakathekileyo eyabakhona kusukela ngaleso sikhathi yiso isisekelo sombuso esitsha kodwa okunye konke kukhanya kungakenzakali kakuhle.
UNyikadzino uthi sesifikile isikhathi sokuba uhulumende eqakathekise amalungelo abantu njengokumunyethwe kusisekelo sombuso ngoba kungaphathisi abantu kangako ukuba ebe kusisekelo engafiki ebantwini :
Umsekeli kamongameli umnumzana Emmerson Mnangagwa onguye njalo umpathitnambo wezemithetho usegcizelele kanenginengi ukuba uhulumende usebenza gadalala ukuguqula imithetho ethile ukuba ihambelane lesisekelo sombuso esitsha njalo sebebumbe lama commission ambalwa agoqela iMedia Commission, i-Human Rights Commission lamanye.
UKuchera uthi ezinye izifiso zikazulu kuli Charter zisuka zenze ukuba abezombusazwe besabele amandla abo okuyikho bengazilandeli ngokugcweleyo okokuthi sokungadingakala ukuba uzulu ehlale ekhumbuza uhulumende ukuba ezilandele.
Lumhlangano ukhuthaze ukuba inhlanganiso zezindaba zisebenze zingela nkethabetshabi njalo ugwalo loluhlu lwabalelungelo lokuvota olwe voter’s roll kumele lubesegcekeni lufinyelelwa ngumuntu wonke njalo lukusimo esihle sikhathi sonke kungela dlakela oluvela emapoliseni labanye.
Ungenwe yinhlanganiso ezizimeleyo ezedlula ezingamatshumi amathathu zigoqela iCrisis Coalition, Zimbabwe Association of Doctors for Human Rights, ZCTU, Nango, NCA, Zinasu, Christian Council, Women’s Coalition le Catholic Bishops conference.