Ukonakala komnotho weZimbabwe kubikwa sekufike kusimo esibi osekubangele ukuthi ingcwethi kwezomnotho zithi sekudingakala ukubamba umhlangano omkhulu wenxa zonke zelizwe kungakhathalekile ngowaliphi ibandla lenhlanganiso kuhlaziywe loludaba kudingwe indlela yokuhlenga ilizwe kunkinga elibhekana lazo.
Ingcwethi elodumo kwezomnotho uMnumzana John Robertson uthi ukuxotshwa mahlayana kwezisebenzi osokusenzakala kukhomba ukuba umumo wezomnotho usukubanga elibi okumangalisayo ethi imbangela enkula ehlisa intuthuko yezomnotho yindleko yokuquba ezamabhizimusi elizweni kuhlanganisela imithelo ephezulu,ama licence abhadalelwayo leholo eliphezulu silinganisa lamazwe afana le Bangladesh,Indonesia,parkistan le China ethi imizamo yokuguqula umthetho wezisebenzi awusoze uphathise kuloludaba:
URobertson uthi amabhizimusi axotsha izisebenzi angenelisa ukuzivuselela ethuthuke aze enelise kwelakusasa ukuqatsha njalo izisebenzi ezinengi ezibhadala iholo eliphansi ukwenzela ukuba ehambelane lokwenzakalayo kwamanye amazwe.
Umsekeli kamgcinisihlalo webandla le MDC-T uMnumzana Morgen Komichi uthi uhulumende sebhidlize ezomnotho elizweni okokuthi sokudingakala ukuba le mbizo ezahluza loludaba kudingwe indlela ezincono zokulungisisa ilizwe:
Ngesikhathi ekhuluma kunanzwa ilanga lamaqhawe uMongameli Mugabe wazise ukuba ezomnotho zithuthuke kancane ngesilinganiso sokuthathu ekhulwini ethi sebethole usekelo lwemali evela e Brazili yokuvuselela ezokulima ukuze ezomnotho zithuthukiswe.Umnumzana Robertson uthi akaboni lokhu kuyiyo indlela engaphathisa udubo olunje:
URobertson uthi uhulumende ngokwakhe ulezisebenzi ezinengi okwedlulisa amalawulo njalo edinga indlela zokwehlisa lelo nani.
Umqondisi wenhlanganiso ye Zimbabwe Informal Sector Organization ZISO uMnumzana Promise Mkhwananzi uthi umumo wezomnotho obangela ukuvalwa kwamabhizimusi lokuxotshwa kwezisebenzi sokwengezelela udubo lwabazafuna ukuzenzela:
Ibandla le Zanu PF kuzinqumo zalo zohlelo lwe ZIMASSET lithembisa ukusungula imisebenzi edlula kuzigidi ezimbili sisiya kumnyaka ka 2018. UMmkhwananzi uthi akaboni lokhu kusenzakala:
URobertson uthi ngaphandle kokwehlisa indleko yokwenza ibhizimusi kuleli kuyadingakala ukuba uhulumende ephinde elungisise izinto ezisekela ukuqutshwa kwamabhizimusi ezifana lokutholiswa kwamandla ka getsi ngokugcweleyo, amanzi lemigwaqo elungileyo abantu betholiswa amalungelo kumphahla yabo.
UMnu. Masimba Kuchera ingcwethi ecubungula ezomnotho uthi ukubhidlika kwezomnotho lokugunyulwa kwezisebenzi kutshiya uhulumende esehliselwe imali ayitholayo kumithelo ethi ubona uhulumende esezadinga indlela zokwengezelela imali aitholayo:
Ingcwethi kwezomnotho zithi inani lezisebenzi selehle lafika kulelo elikade likhona ngomnyaka ka 1968 khona inani labantu bonke ngaleso sikhathi laliyingcosana kulalelo elabakhona okwamanje.Ngesikhathi ilizwe lithola uzibuse inani lezisebenzi zikahulumende kugoqela abezomvikela lalikusilinganiso sokulitshumi ekhulwini kunani labantu bonke elizweni 10% kodwa okwamanje lelinani liyisilinganiso sokungamatshumi amathathu lanhlanu ekhulwini 35% okulinani eliphezulu kakhulu.