Ezinye zezikolo zakoBulawayo, zikhweze ngemali engangamadola angamatshumi amathathu- $30, kuthi ezinye ezinjengamakolitshi ababalisi akhweze nge $130 imali yokufunda umuntu ehlala esikolo, bekhangelele ukuthi kusigaba esilandelayo imali yokuhlala esikolo ibe yi$450.
Lokhu kukhwezwa kwemali yemfundo sokutshiye abanye besithi sekuzaba yinhlanhla ukuya esikolo ngoba indleko yakhona isikhuphukile.
Abazali bakhalaza kuHulumende ukuthi indleko zesikolo zingaqansi ngoba iholo abalitholayo lingeneli. Kodwa kukhanya engani labafunda behlala esikolo akula ngeyinye indlela kuzamele babhadale imali ephezulu ngoba indleko zokudla ziqansa mihla ngemihla.
Unkosazana Nokubonga Moyo ofunda ekolitshi yababalisi eUnited College of Education ukhalaza ngemali yokuhlala esikolo ekhweziweyo.
“Mina ngiyi student lapha eUCE,ngili boarder.I boarding fee yethu sikhwelile,sithe siqala i term sabhadala ama $145 kodwa khathesi siphiwe incwadi ezama top up e $130, sekumele siyibhadale khonapho khonapho ngoba sekuthiwa akusela kudla sekumele sibhadale. Basiphe lezinye incwadi ebezisithi next term nxa siphenduka i Boarding fee izabe isiyi $450,thina sicela uhulumende angenele ngoba lathi siyancediswa ngekhaya, kodwa imali yakhona sisuka ibe nengi kakhulu .”
UMnu. Senzo Ndebele ongumzali ukhala ngokuthi iholo alikhwelanga kodwa indleko zesikolo ziyaqansa.
“Indaba le eyezikolo iyahlupha,ngoba ngeke besuse i fees ku $60 beyise ku $90.Umfanami ugada ka2,ngapha i fees beyikhweza nge $30.Imali yakhona asilayo,asikhwezelwanga imiholo thina, bathi siphile njani abantu laba, angazi ukuthi i government yona ikuthatha njani ukuthi kukhwezwe njalo,nge percentage engako,akusazwisiseki. Kumbe akusela mthetho lapha ekhaya.”
Unkosazana Sipho Moyo ongomunye wabafundi beLupane State University uthi ulesicelo kuhulumende ukuthi lanxa bezakhweza imali zesikolo, kazingaqansi kakhulu .
“Mina ngiyi student eLupane State University, thina satshelwa ukuthi ischool fees sethu sizakhwela but angikabi kwazi ukuthi siyakhwela ngemalini. Silesicelo sokuthi loba bezakhweza, kabangakhwezi kakhulu ngoba le abakade beyi charger ibi right.Labazali khathesi abakwazi ukuthi lanxa begcina i fees bagcina imali ezingakanani .”
Unkosikazi Zandile Tshuma ongumzali uthi indleko abahlangana lazo zinengi, ngakho nga kuqala kukhwele imiholo kungakaze kukhwezwe imali zesikolo.
“Bengilesikhalazo ukuthi i school fees kasingakhweli njengalokhu okwenzakala ema boarding schools,ngoba zinengi indleko esihlangana lazo ngokusa kwamalanga.Uyakwanisa ukuthi nxa ugada imitshova,ufice imitshova siphuzile lomtwana sezaphuza esikolo ucine ugade imota eziqambela imali ayifunayo.Siyacela sibili ukuthi lisizwele,ngoba lemiholo yethu kunje ayikhwelanga, akuqale kubonakale ukuthi nga imiholo iyakhwela kungakaze kukhulunyiswane ngama top up esikolo. ”
Abazali kanye labafundi bakhalaza kuhulumende ukuthi imali zesikolo kazingakhwezwa ngoba isimo sezomnotho singavumi. Okhangela ngezemfundo koBulawayo unkosikazi Olicah Kaira wenqabe ukuphendula imbuzo ye Studio 7 mayelana lokuqansa kwemali zesikolo wayiqondisa ehofisini eseHarare. Asenelisanga ukukhulumisana labase Harare.
