Izifundi zekolitshini leUniversity of Zimbabwe (UZ) zitshengisele ngoLwestihathu zikhonona, ngokukhwezwa kwembadalo yezifundo lezinye indleko zesikolo kanye lokungatholiswa ubulembu be internet ukuze benelise ukufinyelela izifundo zabo bengekhaya, iE-Learning ngesikhathi ilizwe lilwisana lomkhuhlane we Covid-19.
Ukutshengisela lokhu kwenziwa ngesikhathi izikolo sezivuliwe eZimbabwe, kodwa umkhuhlane we Covid-19 usidla amahabula osokubamba ngamandla izifundi ukuba zisebenzise indlela zemitshina yakulezinsuku eyebulenjini beinternet, i-E-Learning.
Omela inhlanganiso yezifundi zemakolitshini eyeZINASU ekolitshini leyi uMnu Lenox Machoko uthi okubenze batshengisele yikuba imali abayibhadalayo kayihambelani lalokho abakuphiwa yikolitshi leyi.
“Silokunengi ukusihluphayo. Okwakuqala kuyikuphuza ukuba basithumele imali ye internet. Ukwehluleka ukukhulma lathi, senza izifundo zethu ku internet. Ukwehluleka ukuthumela internet lokwehluleka ukukhulumisana lenhlanganiso ezithengisa idata kuphambanisa isimo sekolitshi le University of Zimbabwe”
UMachoko uqhubeke esithi ikolitshi le iyehluleka ukunakekela izifundi ezisuka endaweni ezingela bulembu be internet ezifana lemaphandleni.
“Sikholwa ukuba ikholitshi ye University of Zimbabwe (UZ) iyehluleka ukunanekela abantwana abasuka emakhaya. Okunye esikubonayo yikwehluleka ukukhulumisana phakathi kwe kolitshi Labantwana besikolo”
Loba nje izifundi lezi ziphumelele ukutshengisela, ngesikhathi iStudio 7 isiya emoyeni izifundi lezi besezigonjolezelwe ngabantu abacatshangelwa ukuba zinsoli zikahulumende.
Lokhu kuvezwe ngesinye isifundi uMichael Chamani. “Sesiqalile ukutshengisela, kodwa kukhanya engathi uhulumende usethumele insole zikahulumende”
Imizamo yokukhulumisana labekholitshi leUniversity of Zimbabwe yehlule ngoba isikhulumeli se kolitshi le uNkosikazi Irene Nyamakura ube engadobhi ucingo ngesikhathi iStudio 7 idinga umbono wekolitshi. Lemibizo ethunyelwe enkundleni yokuxhumana eye Whatsapp ibingaphendulwa.
Umphathintambo wemfundo yaphezulu uMnu Amon Murirwa laye walile ukupha umbono kahulumende ngodaba lolu.
Izifundi ziyakhonona ukuba lobanje zibhadale imali enengi efana laleyo eziyibhadala lapho zisiya ezikolo nsuku zonke kazikathola imfanelo ezifana le internet yona okumele isetshenziswe ukudinga ulwazi ebulenjini.
Lokhu kudale ukuba izifundi ze University of Zimbabwe, ziphansi kwenhlanganiso ye Zimbabwe National Students Union (ZINASU), zitshengisele zifuna ikolitshi ilungisise lokhu.
