Izakhamizi zako Bulawayo bezithe gwaqa namhlanje zihlangene labenkampani kagetsi eye ZESA kanye lomansipala wakoBulawayo zikhuluma ngenhlupho ezihlangana lazo mayelana lemisebenzi eyenziwa zinhlanganiso lezi.
Umhlangano lo, uqoqwe yinhlanganiso yezakhamizi eye Bulawayo Progressive Residents Association Umhlangano ngenjongo yokuhlaziya ukuqhutshwa kwemisebenzi yikhansili yako Bulawayo kanye lenkampani kagetsi eyeZESA.
Umqoqi wenhlelo enhlanganisweni eye BPRA umnumzana Ambrose Sibindi uchasisa injongo yalumhlangano.
Unkosikazi Ntombizodwa Ncube isakhamuzi sakoBulawayo, ukhalaze kakhulu ngokuthi umanisiphala waleli dolobho uvumela abantu ukuthi bahlale ezindlini ezingela manzi kanye lezambuzi ethi kwelinye icele lomuzi wePumula kulabantu abahleli endaweni lezo ezingela manzi besenzela ingcekeza emaphepheni abawalahlela emagcekeni okusuka kudale imikhuhlane.
Umnumzana Gumede oyisakhamuzi seMinyela uthi ilokitshi labo lilemuli ezisebenzisa impopi eyodwa zizine ethi lokhu kudala ukuxabana kakhulu phakathi kwezakhamuzi nxa sekumele kwehlukaniswe imali yokubhadala.
Umnumzana Ashton Sibanda osebenza ekhangele ezemali kukhansili uthi ukhansili akalamvumo yokwala imali ebantwini laloba yimalini eyokuphungula isikwelede semithelo.
Unkosikazi Ottilia Sibanda ohlala eTshabalala uthi amaklinika kakhansili asesetshenziwa ngodokotela abazimeleyo kumele abiselwe kukhansili ukwenzela ukuthi uzulu afinyelele ukuthola usizo njalo kwehle indleko ezifana lezemota ezithwala abagulayo.
Isikhulumeli sekhansili yakoBulawayo uNkosikazi Nesis Mpofu uthe ukudubuka kwempompi ezithwala ingcekeza kubangelwa kakhulu ngabantu abavula indawo lezi bephosela amatshe kanye lenhlabathi befuna ukuthi kugelezele ensimini zabo.
Okunye okukhulunywe emhlanganweni lo ludaba lokuqhatshwa kwabantu abazasebenza eGodini lapho osekuvalwe khona ukuze kuqale ukwakhiwa isilindo samabhasi kanye lendawo yamavinkili eye Godini Mall.
