Izakhamizi zeHwange leNkayi zibika ukuba izifuyo, ikakhulu inkomo, lokhe ziqhubeka zicuba, ezinye zisifa njalo ezinsikazi ziphunza kulandela isomiso sendlala esidalwe nyakenye yisikhudumezi somkhathi ese-El Nino.
Izakhamizi lezi zithi osekubadida ingqondo yikuba izifuyo ezifa kakhulu ngezimithiyo, ikakhulu inkomo ezifa kanye lamathole ezinye njalo ziphunza. Usobhuku wesiqintini seNduna uMvuthu, uMnumzana Paulos Ntini, uthi lokhu kuqhubeka kusenzeka lobanje utshani sebuhlumile emadlelweni.
“Kucina kungasakhanyi ukuthi kulendlala kumbe sekuyimikhuhlane ebulala inkomo, ikakhulu ezimithiyo. Ziyafa zikhitshwa amathole phakathi esiswini njalo lokhu sekubisela ama farmers emuva, asazi lokuthi sizayiqeda ngayiphi indlela.”
UMnumzana Given Moyo, ukhansila weHwange eKachechethe, uthi bekuphunza nje sonke isifuyo, ezinengi zizisifa.
“Ziyaphela lazo indonki, kuyaphela inkomo, imbuzi okunye kuyaphunza ngenxa yendaba yendlala. Okubenzima kakhulu yikuthi abantu abatholanga usizo kunhlanganiso ezizimeleyo lohulumende ubebuya ngqo njalo eholisa abantu ingqoloyi layo abakhala ngokuthi iyabasongela eziswini.”
UNkosikazi Alice Ndlovu, isakhamuzi seBH11, uthi izifuyo lokhe zizacile, ezinye zisifa.
“Njengenkomeni kuphandle, thina singcono singabantu uyaphuma uyecela komakhelwane uphiwe ngengcebethu.”
UMnumzana Jeffery Sibanda wesigabeni seNkayi, eMathetshaneni, uthi kunzima kakhulu endaweni yakhe.
“Ezinye bezisifa zizala kwesinye isikhathi izale kulandele ithole layo ife futhi njalo ungakhangela inkomo ezinengi lonyaka zicakile, ukudla bezingakitholi, kathesi khona nje ezinye zincibilika, okubangele ukuthi abantu behluleke lokulima ngazo.”
Osabambe isikhundla somholi wohlangothi lukahulumende olubona ngokulondolozwa kwezifuyo olweVetenarinary eMatabeleland North, uMnumzana Gwinyai Zhandire, ukhuthaza izakhamizi lezi ukuba ziphange zisondele kumadokotela ezinyamazana asebenzela kuzigaba zonke zalumhlubulo ukuze zixhaswe ngolwazi.
“Okwenzakalayo yikuba nxa isifuyo simithi, amandla aso ayedla naxa ithole lalo likhula esiswini okwenza nxa sizala iphunze, eyinye iphunze isanda kumitha enye njalo ihle icube. Kuvamile lokhu ngesimo sendlala la le, kodwa ngixwayisa izakhamiz ukuba zisondele emawofisini ethu ngokuphangisa babone odokotela bethu.”
Uphenyo olwenziwe yinhlanganiso yeWorld Food Program ekupheleni komnyak’odluleyo, luveze ukuba inkomo ezifika inkulungwane eziyisitshiyagalolunye -9,000 zafa kusukela ngoMfumfu emnyakeni ka2023 kusiyabamba uNhlolanja ka2024, emazweni aqoqela eZimbabwe, Botswana, Namibia kanye leZambia. Kusukela ngales’osikhathi zinengi kakhulu ezife eMatabeleland ngenxa yokuswelakala kwamadlelo lamanzi.
Uhlangothi lukahulumende olubona ngezokufuya ngenyanga kaMpandula nyakenye lubike njalo ukuba esabelweni seMatabeleland South, kusukela ngenyanga kaNkwenkwezi kusiya kuNcwabakazi, kwafa inkomo ezedlula inkulungwane ezintathu lengxenye -3,500. UZhandire uthi lakulesi sabelo isimo besisibi, ethi kalamvumo yokupha inani lezafayo.
Forum