Uhulumende uthi wemukele izethekeli ezedlula inkulungwane ezilitshumi lanhlanu, 15 000, ngekhefu lekhisimusi eledluleyo edolobheni le Victoria Falls kuphela, okuzamlethela ithuba elihle lokuthi alungiselele umhlangano omkhulu wamazwe womhlaba owe United Nations World Tourism Organization General Assembly ngomnyaka ozayo, lapho abantu abavela emazweni atshiyeneye omhlaba abazathi gwaqa kulelidolobho.
Umgcinisihlalo wenhlanganiso yeHospitality Association of Zimbabwe uMnu. Tich Hwingwiri ubikwa esithi kube lemidlalo etshiyeneyo ethakazelelwe yizethekeli ebezivela kwamanye amazwe, awezwekazi le Africa, kanye lezigabeni ezitshiyeneyo zelizwe kuleli dolobho.
UMayor weVictoria Falls uMnu. Nkosilathi Jiyane utshele uSithandekile Mhlanga weStudio 7 ukuthi inengi lezakhamizi eziphila ngokuthengisa impahla etshiyeneyo zisizakele kakhulu ngokuqonga kwenani lezethekeli kulelidolobho.