Inengi lezakhamizi zeMatabeleland South zithi ngeke zaxolela umufi uMnu. Mugabe lanxa esetshonile, zisithi zalahlekelwa yizihlobo kabuhlungu ngesikhathi seGukurahundi ilizwe lisanda ukuthola uzibuse.
Izakhamizi zeWenlock zithi zilokhu zisebuhlungwini ngodaba lombhuqazwe weGukurahundi ngesikhathi ilizwe lisanda ukuthola uzibuse, lapho okucatshangelwa ukuthi kwabulawa abantu abafika izigidi ezingamatshumi amabili.
Lanxa umufi uMnu. Mugabe wathi okwenzakalayo ngalesosikhathi kwakuyikuphambana kwengqondo nje, uze waya kogoqwa nyawo engaxolisanga ngelesisehlakalo.
UMnu Aleck Ndlovu oweSitezi, lapho okubikwa kwabulawa khona abantu abanengi ngesikhathi seGukurahundi, uthi babelethemba lokuthi sokuzalunga ngesikhathi bethatha uzibuse kanti kababuzanga elangeni.
“Sajabulela iindependence kodwa okwalandelayo kwabaluchuku kwaba ludlame kwabayikubulawa kwabantu kwabayikunyamalala kwabantu.IGukurahundi yinto esimkhumbula ngayo
Kanti ngaphandle kwalokhu simkhumbula ngokubhidliza umnotho welizwe, Inkosi iyenzile intando yayo kodwa lubaba imbali yakhe ibimbi kakhulu ibingcole kakhulu,” kugcizelela uMnu.Ndlovu.
UNkosazana Betty Ndlovu ngesinye njalo isakhamuzi seSitezi. Uthi wazibonela ngawakhe uchuku olwaqhutshwa nguMnu. Mugabe ngalesosikhathi.
“Wabulala abantu abanengi umuntu lo, egqibela abantu bephila eSitezi ngapha esiKalini eShowa abanye ebathatha ebasusa ngapha esiyababulalela eBhalagwe, kalale ungcono yena ngoba uyendlalelwe ngabantu bonke laba, “kutsho uMaNdlovu.
UMnu. Nicholas Sibanda esinye njalo isakhamuzi seSitezi uthi ubelesifiso sokubona uMugabe emiswa phambi kwekhomitshini yokukhumisana umlotha atsho ukuthi kungani waqhuba lumbhuqazwe weGukurahundi.
“Khathesi sizwa kuthiwa kulekhomitshini ebuyayo besicabangela ukuthi uzakubakhona ukwenzela ukuthi aphendule zonke iziga azenzayo besisithi kumbe uzakuthi athi ehamba esesiphe impendulo yesizatho esamenza wenza ulunya olungaka pho siyamzwela uzakubona phambili,” uyagcizelela.
Osakhulayo uMsizi Gumbo uthi uMnu. Mugabe utshiye ehlanyele imbali yodlakela osekudale ukuthi lalabo abamhluthunela umbuso besebenzise indlela efanayo ukwalela esihlalweni.
“Abantu bezwa bebethwa ngumoya kungayisikho ukuthi isintu sethu siyala ukuthi sijabulele ukutshona komuntu kodwa kungabe kubuhlungu kwabemuli kodwa njengelizwe thina siphumule kodwa utshiye ehlanyele inhlanyelo embi kakhulu bathi udwayi ufa lensiba zakhe kodwa lo utshiye insiba zakhe esezisihlaba kakhulu in the form of Mnangagwa,” kugcizelela uMnu. Gumbo.
Umufi uMnu. Mugabe ubikwa ezabekwa endaweni yamaqhawe esigodlweni ngenyanga ezayo ngemva kokwakhiwa kwengcwaba lakhe okukhangelelwe ukuthi kuthathe inyanga eyodwa.
