Izakhamizi zedolobho le Harare zikhuthaza ikhansili ukuba idinge indlela zokuqeda udubo lokusilela kwamanzi lokuvalwa kwawo mahlayana ikakhulu emizini ehlala abanengi.
Okhokhela inhlanganiso yezakhamizi eye Chitungwiza Residents Trust uMnumzana Marvelous Khumalo uthi inhlolisiso abayenzayo ikhomba ukuba udubo lokusilela kwamanzi lokuvalwa kwawo ngezikhathi ezithile kucine kubangela ukuba abantu bagebhe imigodi eminye engahlanzekanga efaka impilo yabantu engozini.
Uthi okuphume kulinhlolisiso le kukhomba ukuba imigodi imele ibe yisilinganiso sama mitha afika ku matshumi amane kumbe okwedlula lokho ukuze ab engalamanzi ahlanzekileyo.
UKhumalo uthe inengi labantu alikwenelisi lokhu licina selisebenzisa amanzi angahlanzekanga ngenxa yokusilela kwemali elizweni.
Uthe njengoba ilizwe selikhangelane lesikhathi sezulu, loludubo luzaba lukhulu okungabangela lemikhuhlane.
Umqondisi we Combined Harare Residents Association, uMnumzana Mfundo Mlilo, uthe akudingakali ukuba idolobho le Harare lichithe imali lisemba izikotsho kulokulungisisa lokuhlela kutsha indlela elingaqhuba ngayo umsebenzi wokutholisa abantu amanzi:
Abenhlanganiso ye Zimbabwe Homeless People’s Federation elamalunga azimuli ezedlula inkulungwane ezilitshumi -10,000 uthe ubuyanga bucina busenza ukuba abantu basebenzise amanzi avela emigodini eyingozi ngenxa yokuthi ikhansili iphuza ukulungisela abantu konke okudingakalayo okufana lamanzi kusaselesikhathi.
Idolobho le Harare lincediswa zinhlanganiso ezifana le UNICEF ighebha izikotsho kundawana ezitshiyeneyo ngenhloso yokulungisa udubo lokusilela kwamanzi.
Emizameni yokulungisisa lolu dubo ikhansili ye Harare ithi iphakathi kokulungisisa isititshi esihlanza amanzi ese Morton Jaffray Water Works ukuze simpompe amanzi afika kuma mega litres angamakhulu ayisithupha-600megalitres, ngesikhathi iwathela emizini ye Harare isithi lumsebenzi obumele uphele lonyaka usuzaphela ekupheleni komnyaka ozayo ngoba bengenelisi ukuvalela abantu amanzi okwesikhathi eside.