Izakhamizi zeBulilima, esabelweni seMatebeleland South, zikhala ngokuthi lanxa sezizwisisa uhlelo lokuhlatshwa kwabantu ijekiseni yokuzivikela kugciwane leCOVID-19, amakilinika lezibhedlela lapho okuhlatshwa khona abantu akhatshana kakhulu.
Sokusithi dlwe, kuzakhamizi zase Bulilima ngokuqhakatheka kohlelo lokuhlatshwa kwabantu ijekiseni eyokuvimba ukumemetheka kweCOVID-19, besithi imikhankaso yemfundiso ngalolubhubhane ikhanya isisabalele njalo isikhona ngempela emangweni lo.
UKhansila kaWard 2 eBhaladza eGwambe, uMnu. Melusi Loveson Nkomo, uthi abantu sebelwamukela uhlelo lokuhlaba uzulu ijekiseni le kodwa abathathisi kahle ukugqoka imask lesocial distancing.
“Uhlelo lokuhlaba abantu bevikela ubhubhane lweCOVID-19 luyamukelwe kahle esiqintini sethu kodwa udubo lusekugqokeni kahle amamask lesocial distancing. Abantu sebedinga ukuhlaba sibili lobanje kukekwaba lemibiko engayisiyo ngokuhlaba lokhu. Kudingakala ukuba abantu bafundiswe ngalo umkhuhlane.”
UKhansika kaWard 21 eNdiweni eBulilima, uNkosikazi Nani Ndlovu, uthi bayayithola imfundiso ngobhubhane lweCOVID-19, udubo nje yikuthi abantu bacina bengaqakathekisi iziqondiso zokuzivikela ngoba bayabe bedinga okuya ethunjini.
“Kulobunzima esigabeni, sicela uhulumende ukuba angenele asisize ngoba sesiphilanzima, akusaphileki, amabhizimusi aselahlekelwa ngoba abantu abalamali njalo sebelahla impahla ngoba sezidlulise isikhathi sokusebenza, sekuhambeka nzima lenhlelo zethu zokuziphilisa sekunzima ukuba siphatheke kizo.”
UNkosikazi Juliet Moyo, ohlala eThekwane eBulilima, uthi isimo seCOVID-19, emangweni wakhe asimanga kuhle.
“Ubhubhane lweCOVID selusibisele emuva kakhulu asisenelisi ukuphila njengakuqala njalo lenhlelo ebesingena kizo asisazenzi sikhululekile, lemali ayisatholakali akusahambeki loba usiyangaphi.”
Izakhamizi zeBulilima zicela uhulumende ukuba angenele asize ngenhlelo zokuziphilisa ngesikhathi ilizwe liphansi kweziqondiso zeCovid-19 Lockdown njalo alethe amakilinika duzane lezakhamizi ngoba akude njalo akuhambeki.
NgoLwesithathu abogatsha lwezempilakahle bakhuphe umbiko othi inanI labantu abahlolwe bafumanwa beleCovid-19 bedlula kancane abangamakhulu amabili-213 leli gcikwane labulala oyedwa.
Ngasikhathi sinye abantu abedlula izigidi ezintathu -3,072,033 bebesebehlatshiwe ijekiseni yakuqala kuthi abedlula izigidi ezimbili-2,240,001 bebesebehlatshwe amajekiseni wonke womabili ifirst lesecond dose.
Uhulumende uthi isifiso sakhe yikufinyelela ukuhlaba abantu abayizigidi ezilitshumi-10 million, ijekiseni yokuvikela iCovid 19, kumbe isilinganiso sokungamatshumi ayisithupha ekhulwini-60%, ukuze ilizwe libe kusimo sokuthi livikelekile abayithi yiherd immunity.