Abalandela umdlalo wenguqu balembono ehlukeneyo phezu kweqembu lamajaha aleminyaka engaphansi kwamatshumi amabili elimela ilizwe emdlalweni wenguqu elikhethwe ukuyaphatheka kumncintiswano walonyaka oweCOSAFA Men’s Under-20 oqhutshelwa kwele South Africa.
Umqeqetshi weqembu labesilisa lama Under-20, uTonderai Ndiraya labanye bakhe bakhethe abadlali abambalwa abayingxenye yamaqembu adlala kusigaba se Premier Soccer League kuqembu labadlali abangamatshumi amabili elizamela ilizwe kumncintiswano weCOSAFA okhangelelwe ukuqala ngoLwesine oluzayo elizweni lase South Africa.
Ukukhetha abadlali ababhaliswe kunhlanganiso ye Premier Soccer League lokhu kusolwe ngabanye abalamaqembu adlala kuzigaba eziphansi abagoqela umnikazi weqembu le Golden White uKhotso Nyathi.
“Konke sikubonile ku Under-20 kodwa okungathi akusijabulisi yikuthi indlela esiyijwayeleyo eyokukhetha abadlali asiyibonanga isenziwa. Thina ko Bulawayo sijwayele ukuba sikhethe abantwana behambe beyehlangana labanye kodwa khathesi siphongubona sekuthiwa abantwana sebekhethiwe,” kutsho uNyathi.
Ngakwelinye icele intathelizindaba yezemidlalo uNash Mkokwayarira yena uthi uyakusekela ukukhethwa kwabadlali abadlala kumaqembu adlala kusigaba se Premier Soccer League loba nje kukhona okusolisayo.
“Ngokubona kwami iqembu lama Under-20 lilokusolisa okuthize ngoba lokhu sibona abafana abasuka kuma academy belokhu begcwala sokungani seliyindawo eyokuthengisa abafana bama academy. Ungananzelela kuPSL kulabadlali abasakhulayo abahlanu ababhaliswa ukuba bedlale kusigaba saphezulu njalo njalo mina ngikholwa ukuba yibo okumele badlale ngoba phela ukuba khona kwabo kumaqembu adlala kuPSL kutsho ukuba bayenelisa ukudlala,” kutsho uMkokwayarira."
Amaqembu akusigaba sePSL alabadlali abakuqembu leZimbabwe ngabalisa eleFC Platinum, eleHerentals, eleNgezi Platinum, eleDynamos, eleBulawayo Chiefs kanye lele Chicken Inn.
Iqembu leZimbabwe likusibaya sika Group A ndawonye leSouth Africa, Lesotho kanye leMozambique.
Imidlalo yalonyaka iqala ngoLwesine njalo abaqali besiziba liqembu leSouth Africa elaziwa ngegama elithiwa Amajita, kanye leqembu le
Zimbabwe elaziwa ngokuthi Young Warriors.
Iqembu le Zimbabwe liqeqetshwa ngu Ndiraya encediswa nguMandla Mpofu kanye lo Nesbert Saruchera. Umqeqetshi wabonozinti ngu Innocent Chogugudza kuthi uPatrick Mutesva nguye imeneja yeqembu.
Amaqembu azadlala ku final yalimidlalo efika emaphethelweni kwa
zilitshumi lantathu kunyanga kaMpalakazi azathola ilungelo
elokuyadlala kumcintiswano owokudinga intshantshu zezwekazi lase Africa.
