Inhlanganiso elwela amalungelo entathelizindaba, iMisa, ithi ithukuthele kakhulu ngamazwi kaMongameli Mugabe awokwethusela intatheli ezichothoza umbuso wakhe.
Ekhuluma ngoLwesibili edilini aliqoqelwe lugatsha olubona ngendaba zezabelo, uMugabe uthe intathelizindaba ezibhala kubi ngombuso wakhe akumelanga zikhale nxa esephindisela.
UMugabe uthe amanye amaphephandaba abhala imbiko yamanga esithi wesaba uNkosikazi Joyce Mujuru ngemva kokuba uMujuru ethule uluhlu lomhlahlandlela azawulandela nxa ethe wangena embusweni ngeviki edluleyo.
"Ukwenza kwentathelizindaba lezi ayisiyo nto esiyikhangeleleyo," kutsho uMugabe emazwini aphume kuphephandaba leHerald. "Nxa sesithatha amanyathelo alukhuni abantu bengakhali."
Umqondisi weMisa Zimbabwe uMnu Nhlanhla Ngwenya usole amazwi kaMugabe la esithi ukwethusela intathelizindaba kwenza zisebenze zingakhululekanga.
"Sithukuthele ngoba amazwi kaMongameli kahambelani lokusebenza kuhle kwentathelizindaba," kutsho uNgwenya.
"Uma ungethusela intathelizindaba ngohlobo alwenzileyo izolo, lokhu kuzakwenza ukuthi intathelizindaba zesabe ukuloba lokho ezikubona kusenzakala."
