Ikomidi yabaphathintambo esanda kukhethwa nguMongameli Jacob Zuma wakweleSouth Africa, ukuthi ihlolisise zonke imbangela zokuhlaselwa kwezizalwane zakwamanye amazwe isiyethule uOperation Thanyela ngenhloso yokubopha zonke izigangi eziselizweni.
Iqula leOperation Thanyela eligoqela amapholisa, amasotsha labohlangothi olubona ngokungena kwabantu elizweni, selibophe abaselizweni ngokungekho emthethweni amakhulu phose amahlanu ngeviki edluleyo kuphela.
Okhokhela ikomithi yabaphathintambo laba umnumnzana Jeff Radebe, onguMphathintmbo ehofisini kaMongameli Zuma, usefunge wagomela esithi ikomiti yakhe izathanyela bonke ubugangi obuselizweni.
URadebe uthi phansi kweOperation Thanyela, amasotsha lamapholisa azangena ezitaladeni lezindlini kudingwa izigangi kugoqela labaselizweni ngokungekho emthethweni.
Kusukela leliqula le Operation Thanyela liqale umsebenzi ngeviki ephelileyo, selingene ezitaladeni, ezindlini lezitezi labopha abakwamanye amazwe abaphose bafike amakhulu amahlanu kanye lezinye izigangi ezitshiyeneyo.
Lokhu sekutshiye inengi lezizalwane zeZimbabwe ziphethe amathumbu ngezandla njengoba abanengi beselizweni ngokungekho emthethweni. Kodwa ukuzingelwa kwabakwamanye amazwe ngamapholisa ngesikhathi besanda ukuzingelwa yizizalwane zakweleSouth Africa ngesikhathi sodlakela lwexenophobia sekutshiye abanengi bezibuza ukuthi kambe akekho yini otshaya inja efihla umphini.
Isizalwane seZimbabwe umnumnzana Mlungisi Tshabalala uthi umangoye uyasola.
UTshabalala uthi osekubethusa kakhulu yinkulumo yesibili esanda kwethulwa yiNkosi uGoodwill Zwelithini. Ngemva kokusolwa kakhulu ngenkulumo yakhe yakuqala eyokuthi abakwamanye amazwe kababuyele kubo, ngempela viki yonale edluleyo uZwelithini utshele izakhamizi ebezibuthene emhlanganweni endaweni yeNondweni kwaXimba ukuthi bonke abakwamanye amazwe abafika kulezo ndawo kufanele basiwe ezinduneni ukuze ziyehlola ukuthi balazo yini incwadi ezibapha imvumo yokuba selizweni.
UTshabalala uthi inkulumo yenkosi le izadala ukuhlukuluzwa okukhulu kwabakwamanye amazwe.
Inengi labeZimbabwe abakweleSouth Africa bathi ikusasa labo kuleli lizwe selibuvilibana.