Uhlangothi olukhangela ukunika imisakazo imvumo yokusebenza olwe Broadcasting Authority of Zimbabwe-BAZ, lugqibe umsebenzi walo koBulawayo ngoLwesithathu, lapho inkampani yesithathu edinga imvumo yokusakaza iCarryslot Private Limited eyethule lokhu ekuphathele uzulu.
Inkampani le eyiyo njalo edinda amaphephandaba eAlpha Media Holdings, agoqela iSouthern Eye, ithi idinga imvumo yokuba lomsakazo webhizimisi, iCommercial Radio, ezabizwa ngokuthi yiSkys FM.
Le ngenye yamankampani adinga limvumo, agoqela imisakazo ye Skies FM leSkyz Metro FM zona ezethule ezikuthwalele uzulu emhlanganweni ofanayo ngoLwesibili.
Ngemva kokwethula indingeko zayo, okhomitshina be BAZ baveze ukukhathazeka besithi iAMH ngani ijonge ukwenza imali nje ingelani lokuthuthukisa uBulawayo.
Bathi lemitshina edingwa yinkampani le yokusakaza ilamandla amakhulu kakhulu angasakaza amakhilomitha alikhulu kodwa ilayisensi yona ibanika imvumo yokusakaza amakhilomitha angamatshumi amane kuphela usuka kulelidolobho.
Ekhuluma emhlanganweni lo, omkhulu kunkampani le uMnumzana Trevor Ncube uthi njengomuntu owazalelwa wondliwa kulelidolobho, ulesifiso sokuthi uzulu athuthuke njalo alondoloze amasiko lendimi ezitshiyeneyo ngomsakazo lo.
Ekhuluma emhlanganweni ofanayo, uMnumzana Kholwani Nyathi ongumhleli wephephandaba le Southern Eye, njalo obengomunye wezikhulumi zalinkampani, uthi kulusizi ukuthi uzulu kanye labanye kukhomitshini le abehlukanisi phakathi komsakazo webhizimisi lomsakazo kazulu.Uthi bazazama ke nxa bengathola imvumo yokusakaza ukugcwalisa izifiso zikazulu ngasikhathi sinye besenza imali yokuqhuba ibhizimisi.
Unkosikazi Sithabile Ndlovu, oyisakhamuzi, ongene lumhlangano, utshele abe AMH ukuthi akajabuli ukuthi lumsakazo ubufuna ukusakaza ngesikhiwa kuphela khona kulelidolobho kugcwele indimi ezitshiyeneyo.Uthi njalo ukungezwani kwabo lohulumende kuyakhathaza ngoba wesaba ukuthi bazafundisa abantwababo indlela yokuphila abangahambelani layo njengabazali lapho besakaza.
UMnumzana Qhubani Moyo, okhulume izolo emele inkampani ye Fairtalk Communications yona edinga ukusakaza iyi Skyz Metro FM, ungene njalo umhlangano wangoLwesithathu. Uthi imihlangano le iqhutshwe kuhle njalo uzulu uphume wazaletha imbono yakhe lanxa nje esithi abanye kuzulu bebethengiwe ukuzahlukuluza amankampani abangawathandiyo.Uqhubeke esithi kodwa lokhu bekumele bakukhangelele njengoba kungumcintiswano wokuthola ilayisensi eyodwa.
Inkampani yesithathu edinga ilayisensi yi Skies Radio Pvt Ltd. Lanxa nje bekuyimihlangano kazulu, umgcinisihlalo weBAZ uDr Tafataona Mahoso lamhla wenqabele abangene lumhlangano ukukhuluma okwenzakalayo ku twitter laku facebook kwathi lamapholisa abekhona alela intathelizindaba ukuthatha amazwi alabo abakhulumayo. I BAZ iyaqhubeka ngomsebenzi wayo ngolweSihlanu edolobheni le Victoria Falls.