Umongameli Barack Obama weMelika uthembise ukuhlaziya kabanzi izijeziso zenotho ezethulelwa eleZimbabwe. Lokhu kulandela ingxoxo eyenziwe nguObama lesizalwane seZimbabwe emhlanganweni wenkokheli yamazwe awezwekazi leAfrica owe US Africa Summit ogqitshwa ngoLwesithathu eWashington DC.
UChingonzo owenze ingxoxo yakhe lomongameli Obama obukelwe emhlabeni jikelele kumabonakude umtshele ukuba abasakhulayo beZimbabwe babhekane lenkinga kwezamabhizimusi zokungatholi usekelo abaludingayo ngabamabhizimusi eMelika ngenxa yalezi zijeziso ezibikwa zibhekiswe kunkokheli ephula ilungelo loluntu.
Esephendula umongameli Obama uvumile ukuba ngempela lezi zijeziso zidalela abantu makhaza imigoqo ebavimba ukuthi benelise ukuziqhubela ibizimusi bekhululekile.
Wacina ngokumkhuthaza ukuthi aze emhlanganweni laye ukuze bahluze loludaba kabanzi badinge indlela ezingaphathisa abasakhulayo ukuthi bengaphanjaniswa yilezi zijeziso kodwa ngasikhathi sinye kungasoze kuphazamise injongo yokubekwa kwalezo zijeziso yokuthi eZimbabwe kulondolozwe imithetho kanye lelungelo loluntu.
UChingonzo uthi uphakathi kokuqoqa umhlangano lo Obama ukuze kudingwe indlela zokulungisisa izijeziso zenotho ezivimba abasakhulayo ukuthuthuka kwezamabhizimusi.
Izizalwane zezimbabwe zikhanye ziyibambe esidukwini emhlanganweni weus-africa leaders summit lo. Omunye wabatshayelwe ihlombe yinkokheli yeMelika phezu kwabasakhulayo abablisa uAbigail Muleya, uZandile Lambu kanye loChingonzo, ngumnumzana Strive Masiyiwa umqondisi wenkampani kamahalekhukhwini eye-Econet Wireless otshele umphakathi ukuthi kumele abasakhulayo batholiswe imfundiso ukuze bathuthukise izwekazi leAfrica..