Izisebenzi ze Air Zimbabwe ezilokhe zingakatholi iholo kusukela ngoNtulikazi nyakenye zikhalale umsebenzi ngoLwesine langoLwesihlanu zitshudulana labaqondisi benkampani le eHarare International Airport.
Izisebenzi lezi ezikade zithwele amabhakane alemibhalo etshengisa ukuthi kazikaholi kusukela nyakenye njalo lokuthi sezibulawa yindlala zibikwa bezizonde okwamagama zaze zakhulumisana labaqondisi benkampani le.
Umnu. Jonathan Kadzura ongumgcinisihlalo we board ye Air Zimbabwe utshele iStudio 7 ukuthi ukutshengisela kwezisebenzi lezi kuveza ukuthi kulohlupho kunkampani le okumele lube ngumthwalo kahulumende.
UKadzura uthi kunzima ukuthi izisebenzi lezi zibhadalwe imali yazo ngenxa yokuthi iAir Zimbabwe kayilamali.
Uthe akwaziwa ukuthi zizabhadalwa nini njengoba lohulumende esithi kalamali yokuvuselela inkampani le esanda kumisa inhambo zendizatshina yazo kwelwe Bbhilithane le South Africa ngokwesaba ukuthi zingathathwa ngamankampani afuna ukubhadalwa izikwelede.
Indizamtshina ekade ithwala uzulu eZimbabwe layo imiswe ukuphapha ngoLwesibili ngenxa yokuthi ife injini. Omanjinela bayalile ukuyilungisa besithi kumele iAir Zimbabwe ibabhadale iholo elingalabhadalwa okwenyanga eziyisikhombisa.
Ezinye izisebenzi lezi bezilokhe zisiya emsebenzini loba bezingatholi iholo.
Umphathintambo wezamankampani kahulumende uMnu. Gorden Moyo uthi kumele uhulumende adinge inkampani engasebenzelena le Air Zimbabwe esilihlazo kuzulu.
UMnu. Masimba Kuchera ingcwethi kwezenotho uthi inkampani le kayivalwe kusungulwe ezabe ibambisana lamankampani azimele wodwa.
