Kambe iqembu lomdlalo wenguqu elibe zintshantshu nyakenye esigabeni sika Division 2 ko Bulawayo ele Talen Vision lizenelisa ukulingisela ele Bulawayo City lona elifike ladlulela esigabeni se Southern Region Soccer League lahle layadlala kuPSL?
Iqembu le Talen Vision libe zintshantshu zesigaba sika Division 3 ngomnyaka ka 2014 kwathi ngo 2015 libe zintshantshu kusigaba sika Division 2.
Leliqembu liphutshe imidlalo yalo nyakenye lilemiklomelo engamatshumi amahlanu lathoba munwe munwe njalo belitshiya lelo eliqede likuzinga lesibili ele Highlanders Under - 19 ngemiklomelo emine.
Umqeqetshi weqembu le Talen Vision uSaul Ndlovu uthi ukubambana kwenkokheli kanye labadlali yikho okudale ukuba liphumelele emidlalweni yalo.
Ukunqoba kusigaba sika Division 2 kuliphe ilungelo lokuyadlala kusigaba se Southern Region Soccer League njalo abalandeli bomdlalo wenguqu sebelinde ukuba bebone mhlawumbe lizenza njengeqembu le Bulawayo City elidlale umnyaka owodwa ku Division One lahle laphumelela ukuyadlala kusigaba se Premier Soccer League.
Iqembu le Bulawayo City libe zintshantshu kusigaba sika Division 3 ngomnyaka ka 2013 kwathi ngomnyaka olandeleyo laba zintshantshu kusigaba sika Division 2.
Nyakenye iBulawayo City ibe zintshantshu kusigaba se Southern Region Soccer League.
Isiphathamandla seqembu le Talen Vision umnumzana uOtrick Siziba uthi yena injongo yabo izakuba yikuzama ukuvikela ukuba bengagunyulwa kusigaba se Southern Region Soccer League.
Ukaputeni weqembu le Talen Vision uWellington Nyathi uthi basebenze nzima ukuba bephakame besuka kusigaba sika Division 3 baze bafinyelele ku Division 1 yikho kuzamele beyale belokhu besebenza gadalala ukuze beyale belokhu bethuthuka njengeqembu kanye labadlali.
Iqembu le Talen Vision lalisaziwa ngokuthi yi Otrick Spares kudala njalo eminyakeni edluleyo beliphathiswa ngumqeqetshi olodumo uCosmas Zulu yena owaziwa ngemisebenzi yakhe kumaqembu agoqela ele Highlanders, AmaZulu, Zimbabwe Saints kanye le Railstars.