Umphathintambo kahulumende obona ngokwethulwa kwemibiko uMnu. Jenfan Muswere uthi akumelanga inhlanganiso ezizimeleyo zingenele kwezombusazwe.
Uthi akulamnkantsho okwethulwe yinhlanganiso yamakholwa eyeZimbabwe Heads of Christian Denominations ethi akumelanga kuguqulwe isisekelo sombuso welizwe ukuze uMongameli Emmerson Mnangagwa eqhubeke esembusweni kungafika umnyaka ka2028.
UMuswere uthi amalunga edale lephalamende akhangelelwe ngoNhlolanja ukuthi azalungisa umthetho omutsha ozalawula ukuhlala kuka Mnangagwa esikhundleni.
Kulamalunga ebandla leZanu PF lamanye akucele leCitizens Coalition for Change elikhokhelwa nguSikhwicamfundo Welshman Ncube afuna kuguqulwe isisekelo sombuso welizwe ukuze umnangagwa eqhubeke esembusweni.
Kodwa banengi abakubandla lezanu pf labaphikisayo abakusolayo lokhu abathi kumele umnangagwa esuke embusweni kungaphethwa isikhathi sakhe sokubusa.
Ukuhlaziya loludaba, sixoxe loMnu. Joseph Tshuma omele iPelandaba/Tshabalala edale lephalamende ekubandla leZanu PF othi kuqondile okwethulwe nguMuswere ngoba abantu bayafunyelwa ukukhuluma abakufunayo.
Kodwa uMnu. Fortune Mlalazi olandela ezombusazwe ezimele uthe akumangalisi okukhulunywa nguMuswere ngoba abakubandla leZanu PF bakwenza lokhu kanenginengi kusabusa umuyi uRobert Mugabe.
Uthe, “Esikwesabelayo yikuthi abanikazi belizwe abakubutho balakho ukugijimisa uMnangagwa njengalokhu abakwenza kuMugabe.”
Forum