Idale le Constitutional Court linqume ukwesulwa kwesigaba 121 somthetho we Criminal Procedure and Evidence Act, ebesisetshenziswa ngabatshutshisi ukuqhubeka bevalele izibotshwa eziyabe zinikwe imvumo yokuhlawula isibambiso sebail ukuze zithoniswe zivela ngekhaya.
Esethula lesi sinqumo lamuhlanje ekuseni edale le ConCourt, umahluli omkhulu uChief Justice Godffery Chidyausiku uthe bakubone kufanele ukuthi sesulwe lesi sigaba ngoba abatshutshisi bebesisebenzisa ngendlela engayisiyo,elocuku.
Lesi sinqumo sithethwe ngemva kokuba amalunga amane ebandla leMDC-T, abalisa omnumzana Fanuel Kamurendo, Shelton Masamba,Tendai Kamurendo lo Wilbert Ndiweni, bekhweze udaba lwabo kulelidale bekhalaza phezu kwalesi sigaba somthetho.
Ngomnyaka ka 2013,abane laba,betheswe icala lokudabula imifanekiso kamongameli Robert Mugabe lakamuyi u Solomon Mujuru emahofisini ebandla leZanu PF, emzini weChitungwiza.
Kulapho sasetshenziswa khona lesi sigaba 121,ngemva kokuba idale likamantshi linqume ukuba bahlawule isibambiso sebail, balelwa kodwa ngemva kwalokho bazofunyanwa bengela icala.
Igqwetha labane laba, ilunga lenhlanganiso yamagqwetha alwela ilungelo loluntu ye Zimbabwe Lawyers for Human Rights – ZLHR, umnumzana Kudzai Kadzere wamukele njenjabulo lesi sinqumo.
Obona ngezokuqhutshwa kwenhlelo kuMDC-T, umnumzana Abednico Bhebhe ngomunye oseke wahlukuluzwa kusetshenziswa lesi sigaba.
Leli nyathelo uthi litshengisa ukuba uhulumende weZanu PF, usephelelwe ngamacebo kungakho usezama ukulungisisa lokho akuphambanisayo.
Lesi sehlakalo sisetshenziswe kakhulu kulabo abaphatheka emikhankasweni yokulwela ilungelo loluntu kanye lamalunga amabandla aphikisayo.
