UChinamasa uthi lanxanje uhulumende efake imithelo ephezulu ekuthengeni izinto kwamanye amazwe ihlandla lakuqala lomnyaka ilizwe libone ukungena kwezinto ezinengi ezinye zazo eziyingozi kumpilakahle kazulu.
Ngakhoke njengo hulumende uthi sebethethe amanyathelo okuvikela uzulu ngokwalisa ukungena kwezinye izinto elizweni ezithengwa kwamanye amazwe emizameni yokuvikela amaindustry alungisa lezo zinto okugoqela ukwaliswa kokungena kweziqhoko ezake zagqokwa ezama second hand.
Ubike njalo ukuthi lezi zinqumo ezizaqala ukusebenza ngenyanga ezayo zigoqela ukwengezelelwa komthelo wezimotha ezithengwa kwamanye amazwe ezileminyaka edlula emihlanu okungenza imithelo le ifike kusilinganiso sokuphethwe kabili kwenengo yemotha. Imithelo yeholo leyenzuzo ibikwa isizagoqela ukuhlawulisa inhlanganiso ezizimeleyo kanye lamabandla okholo athola imali enengi.
Embikweni wakhe lo uChinamasa ukhanye esekela isinqumo esithethwe ngumthethwandaba waphezulu oweSupreme Court sokuthi abaqashi balakho ukuxotsha izisebenzi zayo umsebenzi mahlayana esithi kuphansi kwemithetho ephathelane lezisebenzi yelizwe. Esithi kumele umthetho ungasekeli uhlangothi lunye kodwa kumele uvikele umqatshi kanye lesisebenzi.
Wakhala ngokuthi uhulumende kunje indleko yakhe enkulu ngeyokuhlawula iholo lezisebenzi zakhe ngakhoke idale leCabinet linqume ukuthi isilinganiso seholo sokwedlula amatshumi athoba minwembili ekhulwini-83% semalli kahulumende kumele sehle sifike kumatshumi amane ekhulwini-40%.