Uzulu wakoBulawayo uthi kuqakathekile ukuthi uhulumende lenhlangothi zakhe ezitshiyeneyo anikwe imigoqo azayilandela lapho ekweleda imali ukuze ilizwe lingahlali lingelilwisana lokuzibhadala kungakhanyi lokuthi imali yakhona yasebenzani.
Uzulu wakoBulawayo ubethe gwaqa ngoLwesine kulelidolobho kutshukwa indaba yokweboleka imali emthethweni odinga ukubekwa oweDebt Management.
Ikhomithi yephalamende ephatha umsebenzi wezemali lentuthuko kwezenotho yelizwe, iParliamentary Portfolio Committee on Finance and Economic Development, ibixoxisana lozulu ngomthetho lo odinga ukubekwa kanye lowe Joint Ventures.
Ingxoxo le iza ngesikhathi uhulumende ethwele nzima ukubhadala izikwelede zakhe inengi lazo elalibolekwa ngesikhathi umqondisi webhanga lesizwe uDr Gideon Gono elwisana lokuwa kwenotho yelizwe.
Izakhamizi zithi ukubona kanye yikubona kabili kungakho iqakathekile imigoqo ezakutsho ukuthi ngubani oboleka imali, sokutheni njalo ibiselwe njani.
UMnumzana Percy Mcijo, owenhlanganiso ye ZIMCODD, uthi kuqakathekile ukuthi kubekwe obala ukuthi imali nxa ibolekwa ikhangelelwe ukwenza msebenzi bani hatshi ukuthi iphonguthathwa nje enye isiyaqhuba inhlelo zebandla le Zanu PF.
Uthi nxa kukhangelwa izolo kanye lemali ilizwe elithwele nzima ukuzibhadala, inengi lazo lasetshenziswa ukudinga usekelo ebantwini bebandla leli kwathi enye yazingenela ezikhwameni zabaphathintambo.
UDr Samukele Hadebe oyingcitshi ekucubunguleni izinqumo ezithathwa nguhulumende laye ungene lumhlangano.
Isisekelo sombuso, uthi sikubeka obala ukuthi kumele kube lomthetho ozakutsho ukuthi imali ibolekwa nxa kutheni ngubani kodwa abenza umthetho kabangakhohlwa njalo isahluko 298 esikhuluma ngokuthi imali kanye lenotho eselizweni kumele yabiwe ngokulingeneyo kuzigaba zonke zelizwe.
Uthi makungakhulunywa ngamandla okuboleka imali kuphela langezivumelwano zokusebenzelana kuJoint Ventures kodwa kungakhulunywa ngokuthi limali isebenzela bani njalo izivumelwano lezi zithuthukisa bani.
Wengeze esithi okwakhathesi kumele ukuthi kube sokwabiwa amandla okuzibusa kuzabelo lazo eziyabe zidinga ukuthi zitshelwe ukuthi ziboleka imali sokutheni isiyasetshenziswani.
Umnumzana Mcijo uthi yena vele kungani ikhomithi le ihlezi ikhuluma ngemithetho yezikwelede kodwa kungela ekwenzayo ngemithetho yokuthuthukisa inotho yelizwe okuyingxenye yomsebenzi wayo.
Uthi akulungiswe inotho yelizwe abantu basebenze kungakaqakathekiswa ukuboleka imali ngoba ukuhlala ilizwe lingelicelayo akukhuphi ilizwe kudonga elikulo ngenxa yokuwa kwenotho njalo kuzenza kube nzima ukuthi layonaleyo imali ibuyiselwe.
Umgcinisihlalo wekhomithi le uMnumzana David Chapfika uthi lanxa kungayisiyo yonke imbono kazulu ezakungena kulumthetho kuqakathekile ukuthi beze emphakathini baphathisane ukwehlukanisa imbambo lomgogodla.
Umhlangano wakoBulawayo ubelabantu abangaphezu nje kwekhulu obekungcono kakhulu kuleminye efana lowe Victoria Falls owawulabantu abathathu.