Abesigodlo sommeli weMelika eZimbabwe, bamanyane labenhlanganiso yabakumsebenzi wokulibazisa uzulu ngomculo lemigido, eyeJibilika Dance Trust, ekusunguleni uhlelo lokufundisa abaculi bengoma zimdumo oweHip-hop baseZimbabwe, ngendlela zokusebenzisa lumculo ukumelana lengxabano, ukufuthelana kanye lokuthi abakulumsebenzi bathole inzuzo bewuphatha njengebhizimusi.
Abangene emhlanganweni lo, obizwa, “Next Level”, ozaqhutshwa okwamaviki amabili eHarare, bemukele ngenjabulo lolu hlelo besithi bayalijabulela leli thuba lokuzilolonga lokucijisa umsebenzi wabo ekuculeni iHip-hop.
Osebenza esigodlweni sommeli weMelika eZimbabwe, uMnu. Butholezwe Nyathi, uchasise kabanzi ngaloluhlelo olusungulwe namuhla eZimbabwe College of Music, eHarare.
Uthe, “Okubalulekileyo kuhlelo lolu yikuthi sisebenzise iHip-hop ukukhuluma ngokuthuthukisa izigaba lokuxazululwa kwezingxabano emphakathini. Eyinye injongo-mhloko ngeyokuthi ontanga bengaphila njani nxa sikhangele umculo weHip-hop. Kuviki ezimbili ezizayo, yizo inkulumo ezizabe zikhona.”
Kulabaculi abazingcitshi abane abavele kweleMelika ukuzofundisana lalabo abasacathulayo kwezokucula ingoma zinye abase Zimbabwe, ikakhulu abasakhulayo.
Omunye wabane laba, yena oyingcitshi ekugideni ingoma zomdumo weHip-hop, uLady Beast, utshele iStudio7 ukuthi “Abanye bayayangeka ukugida, kodwa lokhu yikuhlalela isipho sakho. Ukugida kunceda ekuthini awucabangi okunengi-nengi njalo kuphathisa imizimba yethu ukuthi iqine. Ngikhuthaza omama lamankazana ukuthi bengesabeli khatshana.”
Osakhulayo wakoBulawayo, ocula iHop-hop, owaziwa ngokuthi nguBrints, laye uphatheka emhlanganweni wemfundiso oweNext Level.
Yenake uthi uhambo lusaselude ukuze abazali lezigaba bamukele umculo awuthanda kangaka, “Ngizisebenzisa njengomzekeliso, umama wayengathakazeleli kangako ukuthi ngenza okweHip-hop. Kodwa uthe elalela izingoma zami, wangitshayela ihlombe esithi ngicula okutshiyeneyo labanye abaziyo abakumculo omunje. Mina ngikhuluma ngalokho esihlangana lakho empilweni zethu nsuku zonke. Kodwa wahle wangicwayisa ukuthi ngitshiye okudakayo.”
Omunye njalo odabuka koBulawayo, okumsebenzi wemigido etshiyeneyo, uVanessa Nyoni, laye okade ekhona namhlanje, uthi uyalithakazelela leli thuba abaliphiweyo, ukulolonga amathalenta abo.
“Kuhle kakhulu okwenziweyo, ngoba kuyasinceda ukuthi sithole ezinye indlela zokuphakamisa imisebenzi yethu. Kuthi njalo, kusikhipha ezintweni zobungezwa ezifana lokuthatha izidhakamizwa. Okunye yikuthi, ngolwazi esilutholayo, siyenelisa lathi ukufundisa abancane kithi phezu kweHip-hop,” kutsho uMaNyoni.
Kodwa banengi abangathakazeleli ingoma zeHip-hop, besithi zikhuthaza ingxabano, njalo zilenhlamba lokuncindezela abesifazana loamantombazana.
Kodwa okhokhela inhlanganiso yeJibilika Dance Trust, uMnu. Plot Mhako, uyakulandula lokhu, esithi kunengi okuncomekayo okutholakala emculweni weHip-hop, okugoqela inzuzo eziphilisayo kanye lekulondolozweni kwelungelo loluntu.
Amazwi kaMhako agcizelelwe ngumculi olodumo, uMnu. Albert Nyathi, othi, abaculi abalethalenta lokucula umdumo oweHip-hop, bengalaleli ababadonsela emuva.
UNyathi uthe, “Imiculo iyatshiyana, yikho kulezinye ingoma ezingazwakali emsakazweni, kodwa zitshisa endaweni zokuzilibazisa ezinjengamabhawa. Akumelanga sincindezele labo abasemsebenzini wokusilibazisa. Masibasekeleni, sibatshiye benze lokhu abazinikela ukwenza ngenxa yamathalenta abo.”
Ingcwethi ezine zomdumo oweHip-hop ezivele kweleMelika ezikhokhela umhlangano wemfundiso lo ngabathi uLady Beast, uDee-1, uNick Neutronz kanye loKritigi Rao.
Limfundiso ibikwa igoqela konke okuphathelane lomculo oweHip-hop, kanye lokuthi abaculi abalesipho sokucula lokugida bangaziphilisa njani kulumsebenzi.
Mhlaka 19 walinyanga, kuzaqhutshwa umdlalo wokuphetha umhlangano wemfundiso oweNext Level, eHarare lapho abaphatheka kulolu hlelo lwamaviki amabili bazaba lomdlalo wokucula lokugida, betshengise ubungcitshi babo phezu kwalokho abakufundisiweyo.
Forum