Isikwelede seqembu le Highlanders sedlula ingxenye yesigidi samadola asemelika loba nje nyakenye leliqembu lilahlekelwe yimali encane kulaleyo elahleke ngomnyaka ka 2014.
Intathelizindaba yethu yezemidlalo uJoseph Njanji usipha loludaba ndawonye lezinye.
Nyakenye iqembu le Highlanders lilahlekelwe zinkulungwane ezifika phose amatshumi amane ikanti ngomnyaka ka 2014 leliqembu lilahlekelwe zinkulungwane ezingamatshumi ayisithupha.
Loba kunjalo isikwelede seqembu le Highlanders lokhe sisikhulu njengoba leliqembu likweleda inkulungwane ezedlula amakhulu amahlanu ($576 702).
Umsekeli omkhulu weqembu le Highlanders uTshinga Dube ukhuthaze inkokheli yeqembu ukuba idinge usekelo lwemali kuzizalwane zeZimbabwe ezisebenzela kwamanye amazwe.
“Imali kayikho yikho kasizame ukuba sivule impiko zethu sidingeni amajaha angasincedisa ukuba iqembu lethu liphumelele. Manengi amadoda akithi abaphethe imisebenzi emikhulu njalo abayithandayo iHighlanders pho ke thina asilisebenzisi lelithuba lokuba sithole imali kuwo lawa majaha angaphandle ayiwo athola imali,” kutsho u Tshinga.
Inkinga ebhekane leqembu le Highlanders yikuba alisatholi mali enengi evela kuzibukeli ezingena enkundleni ngosuku lomdlalo ngenxa yezizatho ezehlukeneyo ezigoqela ukubhadala imali ezinkulu kunhlanganiso ezithile eziqhuba umsebenzi enkundleni kanye lokubhadala inhlanganiso ezibona ngokuqhutshwa kwezemidlalo elizweni.
Nyakenye iqembu le Highlanders lithole inkulungwane ezedlula ikhulu ($126 887) ebhadalwe ngababukeli abangene bezobona imidlalo yeligi kanye leyenkezo ezehlukeneyo.
Iqembu lamajaha aleminyaka engaphansi kwelitshumi lathoba munwe munye elimela ilizwe emdlalweni kakhilikithi lidliwe ngama runs angu 129 liqembu le England ngeSonto emdlalweni walo wesibili owesibaya sika Group C kumncintiswano wezizwe zomhlaba oqhutshelwa kwele Bangladesh.
Emdlalweni walo wakuqala iqembu le Zimbabwe linqobe ele Fiji ngama wickets ayisikhombisa ngoLwesihlanu olwedluleyo.
Emdlalweni walo wesithathu ozadlalwa kusasa ngoLwesibili iqembu le Zimbabwe lizadlala lele West Indies.
Womabili lawa maqembu alemiklomelo emibili okutsho ukuba elizanqoba yilo elizadlulela kusigaba esilandelayo esomncintiswano ndawonye lele England lona elilemiklomelo eyisithupha ngemva kokunqoba kuyo yonke imidlalo yalo yezibaya emithathu.
Kunjalo nje, iqembu le Chicken Inn lithi amalungiselelo alo awenkezo ye African Champions League asekusibanga esiphezulu. UGibbs Dube weStudio Seven uxoxe lomgcinisihlalo weqembu leli, uLifa Ncube ukuze sizwe amalungiselelo aleliqembu.