Iqembu lomdlalo wenguqu ele Highlanders linqobe ele Flame Lily nge 1 ka nya emdlalweni wesigaba se Premier Soccer League obusenkundleni ye Barbourfields namhla emini.
Umdlali weqembu le Highlanders uSimon Munawa nguye ohlohlele leliqembu ngehlandla lesibili lomdlalo kodwa indlela iBosso edlale ngayo itshiye abalandeli abanengi bengasuthisekanga.
Limpumela itsho ukuba iqembu le Highlanders selilemiklomelo engamatshumi amabili lathoba minwe mbili (28) kodwa liyale lilokhu likundawo yetshumi engalaneni.
Komunye umdlalo obukhona namhla iqembu le Buffaloes linqobe ele Dongo Sawmills nge 1 ka nya enkundleni ye Sakubva.
Limpumela itsho ukuba iqembu le Buffaloes selilemiklomelo engamatshumi amabili lanhlanu njalo seliqanse layahlala kundawo yetshumi lanye ngemva kweqembu le Highlanders.
Kolunye udaba olumayelana lomdlalo wenguqu umqeqetshi weqembu le How Mine uLuke Masomere usetshiye umsebenzi ngemva kokuba iqembu lakhe selihambe imidlalo embalwa lidliwa ngamanye amaqembu.
UMasomere uthi yena ubone sekufanele ukuba atshiye umsebenzi ngoba impumela yemidlalo ebidlalwa liqembu le How Mine ibingekho nhle.
Abangenisa iqembu le How Mine kusigaba se PSL uSheunesu Chaka kanye lo Jerry Makota yibo asebezibambe esidukwini kuqembu leli.