Abakumsebenzi wokwethulwa kwezindaba elizweni bakhuthaza uhulumende ukuthi asungule imisakazo ezabe egxile kakhulu kunhlelo eziqondane lezemfundo eZimbabwe, njengalokho okwenzakala kweleSouth Africa.
Omunye wabo nguNkosikhona Dibiti, intathelizindaba yakoBulawayo, eyasungula umsakazo kamabonakude osakaza enkundleni yokuxhumana eyebulebunjini eyeFacebook, oweCommunity Podium TV.
UDibiti uthi inengi labantu elizweni aliyenelisi ukufinyelela ukusebenzisa ubulembu obe-internet ukuqhuba izifundo ezinjenge e-learning, ngenxa yendleko enkulu yokuhlawulela leyo internet. Ngakhoke uhulumende kumele akhengelisise ukusungulwa kwemisakazo ezaba lenhlelo zemfundo ikakhulu eyezigaba eyamaCommunity Radio Stations.
“Ngombono wami uhlelo lwamaradio kanye lama TV luhlelo oluhle kakhulu, nxa sesikhangela ikakhulu abantu abasemaphandleni. Kuncono ukuthi kwenziwe ama station akhangele kweze education, singahlanganisi lalawa amastation ebesivele silawo. Kube lalawa awe education ukuthi umntwana ebekwazi ukuthi ngalesi sikhathi sifunda lokhu,” kutsho uDibiti.
UDibiti uphinde wathi uhulumende angasungula imisako le, ilakho ukusebenziswa nguzulu ngemva kokudlula komkhuhlane weCoronavirus.
“Noma ilockdown kumbe isikhathi lesi seCorona singathula kuba lula kakhulu ukuthi imfundiso zona leziyana ziqhubekele phambili,” kutsho uDibiti.
