Intathelizindaba zithi okukhangelelwe ukuba ngumthetho omutsha ozalawula indlela yokusebenza kwazo, owe Media Practionioners Bill, kumele ukwenze kube yimfanelo ukuthi abafuna ukuba zintathelizindaba babe ngabantu abafundileyo.
Lokhu kuphume emhlanganweni obuqoqwe yinhlanganiso yeMedia Institute of Southern Africa (MISA-Zimbabwe) ngoMgqibelo eHarare ngenjongo yokuzwa imibono yentathelizindaba ngomthetho lo ungakakhwezwa kulabo abazawuloba kanye ledale lephalamende.
Umthetho lo ukhangelelwe ukudala umahluko phakathi kwabaqhuba umsebenzi wokuhlekisa abantu, abenza umsebenzi wokuthumela indaba ebulenjini be internet kanye labafundela ngokupheleleyo ukuba zintathelizindaba.
Intathelizindaba ezikhulume emhlanganweni lo ziveze ukuba kazithokozi ngendlela umsebenzi wazo okhangelelwa phansi ngayo ngenxa yalabo ababhala indaba ezingamanga.
Intathelizindaba esebenza izimele uJerry Zingwevu uthi kumele abantu abafuna ukuba zintathelizindaba bafunde.
Umhleli wenhlanganiso ye NewZimbabwe.com uNkosana Dlamini ugcizelele wathi ukufunda kwenza intathelizindaba ziqhube umsebenzi wazo ngobuciko obukhulu.
Umthetho lo uzakwenza kube logatsha lwe Media Council oluzabe luhlola ukusebenza kwentathelizindaba, njalo lukhuza labo ababhala indaba ezingasiqiniso.
UTafadzwa Chigandiwa oyintathelizindaba uthi umsebenzi lo akumelanga wehlukanise phakathi kwababafundileyo labangafundanga.
Umthetho we Media Practictioners Law ngomunye wemithetho ekhangelelwe ukusetshenziswa ngemva kokuqunywa phakathi kowawukhona owe Access to Information and Protection of Privacy Act (AIPPA).
Ukhangelele ukuba khona ngomnyaka ozayo kulenkuthazo yokuba uhulumende ahloniphe amalungelo oluntu.
Uhulumende uthi ubeka imthetho le elenhloso yokufuna ukuba uzulu akhululeke njalo athole imibiko eliqiniso, eyethulwa ngabantu abalobuciko kulumsebenzi.
