Intathelizindaba sezisole ukubotshwa komunye wazo uBlessed Mhlanga owetheswa amacala amabili okwethula imbiko ephehla udlakela ngemva kwengxoxo yakhe lelunga leZanu PF Central Committee uMnu Blessed Geza, yena ohola abalwa impi yenkululeko abathi kumele uMongameli Emmerson Mnangagwa asuke embusweni ngoba ekhohlakele.
UMhlanga, osebenzela iphephandaba leNewsDay kanye lomsakazo kamabonakude oweHSTV, uzalala esitokisini eHarare Central Police Station abesemiswa enkantolo ngoLwesibili.
Amapholisa athi wephula umthetho weCriminal Law (Codification and Reform) Act kungxoxo ayenza loGeza mhlaka 27 ngoZibandlela lakwenye ayenze mhlaka 11 kulinyanga.
Kulezongxoxo ezasakazwa ngumabonakude weHSTV, uGeza watshela uMhlanga ukuthi yena labanye bakhe abalwa impi yenkululeko abafuni lakuzwa ngomkhankaso wabasekeli bakaMnangagwa owokuthi kumele aqhelise umbuso wakhe.
UGeza wathi njalo bafuna uMnangagwa esuke esihlalweni ngokuphangisa hatshi ukumelele ukuphela kombuso wakhe ngo2028 ngoba esehlulekile ukulungisa indubo ezihlupha umphakathi njalo engumuntu okhohlakeleyo.
Inhlanganiso yamagqwetha, eyeZimbabwe Lawyers for Human Rights, ithi amapholisa abuzisise uMhlanga mayelana ngomsebenzi wakhe kanye lengxoxo zakhe loGeza.
UMnu Geza laye udingwa ngamapholisa, wona amethesa amacala abalisa elokuthuka uMongameli Mnangagwa, elokutshotshozela udlakela kanye lelokuntshontsha.
UMhlanga yena uqale ukudingwa ngamapholisa ngoLwesihlanu kodwa uhambe wayazinikela enkambeni ngoMvulo ngoba esithi ubengezwa kuhle emzimbeni.
Umqondisi wenhlanganiso yabahleli eyeZimbabwe National Editors Forum uMnu Njabulo Ncube utshele iStudio 7 ukuthi bayakusola kakhulu ukubotshwa kukaMhlanga.
Intathelizindaba ezisebenzela imisakazo lamaphephandaba azimeleyo zithi kusobala ukuthi isisusa sokubotshwa kukaMhlanga yikufuthelana okukhona kubandla leZanu PF phakathi kwabalandeli bakaMnangagwa abafuna eqhelise umbuso wakhe lalabo abathi kumele atshiyele umsekeli wakhe uMnu Constantino Chiwenga intambo zombuso.
Yena uMongameli Mnangagwa ugcizelele ngeviki edluleyo ukuthi uzasuka embusweni nxa isikhathi sakhe esiphoqelelwa yisisekelo sombuso welizwe singafika ngomnyaka ka2028.
Forum