Intathelizindaba zikhuthazwa ukuba zidinge indlela eziphakemeyo ezokuthola imali ezinjengokusebenzisa ubuciko obukhaliphileyo bokuthapha izindaba, okubizwa ngokuthi yi-Artificial Intelligence. Lokhu lokunye okuqakathekileyo kwethulwe namuhla emhlanganweni omkhulu owe6th Annual Journalism and Media Summit oqhubekela phambili eHarare.
Ingcwethi ezikhulume emhlanganweni lo, oqoqwe yinhlanganiso yeZimbabwe Centre for Media and Information Literacy njalo osekelwa yiKonrad Adenauer Stiftung yakweleGermany lezinye, zithe ubulembu beInternet kanye lenkundla zokuxhumana kwenza kube nzima ukuba intathelizindaba zisebenze njengakudala lapho ezazisenelisa ukuloba izindaba ezazibalwa kakhulu nguzulu okwakubangela ukuthi kuthengwe amaphephandaba kulalelwe lemisakazo.
Zithi lokhu kwakubangela ukuba amankampani ezindaba athole imali enengi labo beholiswe ngemfanelo. Omunye wengcwethi lezi uMnu Lenox Mhlanga Zimbabwe Centre for Media Literacy uthe kuqakathekile ukuba intathelizindaba zidinge indlela zokuphanda imali zisebenzisa ikakhulu ubulembu be-internet.
“Sixoxe ngokuba kusetshenziswe indlela zokuba kudingwe imali esiyithi yi monetization ngesilungu. Lokhu kuzakwenza ukuba amankampani akuleli lase Africa jikelele enelise ukuba lemali ngoba akusela mali ku advertising lezinye indlela ezazibanikeza imali kudala. Kumele bahambelane lesikhathi,’’ kutsho uMhlanga.
UMnu. Leslie Phiri osebenzela inkampani yeCenter for Information Communication Technology, obesemhlanganweni lo, uyakusekela lokhu.
“Sesibenzisa indlela zakulezinsuku ezifana lama click baits lokudinga abantu ababuka imfanekiso ku YOU TUBE, lokhu kwenza ukuba siding imfanekiso ebonwa ngabantu bonke konke silokhe sidingisisa indaba ze democracy lamalungelo abantu,’’ kugcizelela uPhiri.
Omunye obesemhlanganweni lo osebenzela inhlanganiso ebona ngamalungelo entathelizindaba uMnu. Loughty Dube uthi kumele intathelizindaba zifundele ukusebenzisa imitshina yeArtificial Intelligence ukuze amankampani azo athuthuke.
“Emhlanganweni wanamhlanje sifuna ukuba intatheli zisebenzise iArtificial Intelligence kabanzi. Yikho esikufunde kwamanye amazwe ukuba bakwenza njani.”
Ofundela umsebenzi wokuba yintathelizindaba, uMuziwethu Ncube, uthi ufunde okunengi emhlanganweni lo.
“Ngifunde indlela abenza ngayo kwele Nigeria eKenya lakwamanye amazwe. Lokhu kuzakwenza ukuba lapho siqede isikolo lathi sivule indlela zethu ezintsha zokusebenza singamelele imsebenzi yokuphiwa.”
Abaphatheke emhlanganweni walonyaka ngabantu abagoqela abafundisa emakolotshini ezindaba, abafundela ukuba zintathelizindaba, abakunhlanganiso ezizimeleyo labanye abavela kweleKenya, Malawi, Nigeria leSouth Africa.
Forum